أول ظهور تلفزيوني ل باسم فغالي بال 96: عم بقلد الصبوحة!

إذا بتتذكروا الأيام الحلوة من طفولتنا، في إسم ما فينا ننساه، وهو باسم فغالي. هيدا الشخص اللي دخل قلوبنا بكل بساطة وارتبط إسمو بالضحك براسنا وصار ذكرى حلوة من خلال تقليدو لشخصيات لبنانية مشهورة، واللي كانت جزء كبير من حياتنا.

بتتذكروا أول ظهور لباسم فغالي على التلفزيون؟ سنة 1996، ضمن برنامج استديو الفن، والصبوحة قدامو! لحظة تاريخية ما بتنتسى!

هيدي الظاهرة اللي رافقت طفولتنا، وخلتنا نحلم ونحب لبنان من خلال تقليدو للشخصيات اللبنانية الشهيرة، حلو نرجع نتذكر مسيرتها الفنية. باسم فغالي، اللي تقدم لبرنامج استديو الفن سنة 1996، ما كان مجرد هاوي، بل كان محترف من أول ظهور.

المخرج سيمون أسمر شاف في موهبة كبيرة، وقرر يدعمو ويقدمو للجمهور، لأنو كان عارف إنو هالموهبة رح تترك بصمة.

باسم فغالي: رحلة عبر الزمن مع ملك التقليد اللبناني

بأول ظهور إلو، قلد باسم الصبوحة وغنى “رقصني هيك”. الصبوحة ضحكتلو من قلبها، ضحكة صادقة من فنانة كبيرة لفنان صاعد، ولجنة التحكيم، اللي كان فيها الراحل العملاق الياس الرحباني والراحل الكبير روميو لحود، ما بقي حدا ما ضحكلو. باسم شق طريقو لقلوبنا من أول لحظة، بذكاءو وخفة دمه.

بأول ظهور إلو، باسم مش بس قلد الصبوحة، قلد كمان الست فيروز وهي عم تحضر الصبوحة! تخايلوا هالمشهد التقليدي، الست فيروز غيرانة من الصبوحة يلي عم تفز وتنط وهني من جيل بعض. وليكو بالآخر بعد هالسنين، راحت الصبوحة وبقيتلنا فيروز.

وهيك باسم فغالي صار “نمرة” أساسية ببرامج سيمون أسمر، وشارك مع نجوم كبار متل نوال الزغبي وفارس كرم ووائل كفوري، اللي كانوا بنفس الفترة عم يبلشوا مشوارهن الفني.

بعد ما صار لحالو، باسم فغالي صار يفضل يظهر بإطلالات خاصة، عبارة عن حلقات تلفزيونية فيها اسكتشات منوعة، بيحضرها وبيكتبها وبيخرجها بنفسو. وهيك أبدع كمان. عملت هل سكيتشات ضجة كبيرة على التلفزيون وعلى وسايل التواصل الاجتماعي، لأنو كان بيقدم فن راقي ومضحك بنفس الوقت.

وهلق وبعد مرور 29 سنة على أول ظهور إلو… منرجع بالذاكرة لورا ومنضحك من قلبنا ومنقول منيح كان عنا باسم فغالي ليشيل الهم عن القلب بكل شي عشنا بهل فترة.

باسم فغالي رح يضل رائد التقليد، وضحكتو رح تضل بقلوبنا. كل ما نسمع إسمو، رح نضل نركض قدام التلفزيون لنشوف شو عندو، ونضحك من قلبنا، لأنو بيذكرنا بأيام لبنان الحلوة، وبفن أصيل ما بيتكرر.

شوفوا كمان، بتعرفوا شو كان أول فيلم للشحرورة صباح؟ خلينا نتذكر!