شو قصة مسلسل نيكول سابا يلي عامل ضجة بمصر؟

بعجقة المسلسلات الرمضانية، في مسلسل مميز عم يعمل ضجة بمصر والكل عم يحكي عنو! مش بس ماغي بو غصن، سينتيا كرم، ودانييلا رحمة عاملين ضجة هالسنة، نيكول سابا رجعت بقوة وعم تفرض حالها على الساحة المصرية بمسلسل “وتقابل حبيب“.

المسلسل عم يحقق نسب مشاهدة عالية، ونيكول بشخصية “رقية العسكري” خطفت الأضواء من أول حلقة. الأصداء رائعة، والجمهور المصري واقع بغرام أدائها، والسوشال ميديا عم تحكي عنها. والملفت إنو هيدا أول عمل مصري كبير لإلها من فترة، لكن رغم الغياب، الجمهور بعدو ناطرها وما نسيها!

نيكول مش غريبة عن مصر، من زمان إلها قاعدة جماهيرية كبيرة، وأدوارها عطول بتترك بصمة. بس هالمرة المنافسة قوية، مع نجوم كبار متل ياسمين عبد العزيز، ورغم هيك، عم تفرض حالها بقوة. فينا نقول إنو الممثلات اللبنانيات عم يخطفوا قلب الجمهور المصري من سنين، ونيكول وحدة منهن. لدرجة صارت حديث الصحافة والسوشال ميديا أكتر بمصر من ببيروت!

شو قصة مسلسل نيكول سابا؟

ليل بتكتشف إنو زوجها متجوز عليها بالسر، فبتتركو وبتوقع بغرام خيو! بس الموضوع ما بيوقف هون، لأنو بتكتشف سر خطير عن مرتو الجديدة، وبتقرر تخوض معركة على جبهتين: الحب والعدالة.

المسلسل بطولة ياسمين عبد العزيز، كريم فهمي، انوشكا، خالد سليم، نيكول سابا، بسنت شوقي، حنان سليمان، إنجي كيوان، وندى موسى. كاست قوي وقصة مشوقة، مش غريب إنو مكسر الدني.

إذا بعد ما بلشتوا تحضروا، فيكن تلاقوا على منصة شاهد. ومع كل حلقة، الجمهور عم يتعلق أكتر وأكتر بنيكول، وأداءها عم يكون حديث الصحافة والمواقع.

كل التوفيق لنجمتنا اللبنانية يلي أثبتت إنو الفن ما إلو حدود، وإنو لبنان بيصدر نجوم من الطراز الرفيع. مبروك النجاح، ومنتمنى نشوفها بأعمال أكتر وأكتر!

شوفوا كمان، كزدورة معنا على الأماكن يلي تصور فيها مسلسل بالدم!