٩ بيوت ضيافة ومنتجعات قاعدة بقلب الطبيعة بلبنان!

إذا بتعشقوا الطبيعة والرواق، لبنان مليان أماكن بتخطف الأنفاس. شو رأيكن تهربوا شوي من العجقة وتعيشوا كم يوم بأماكن بتجمع بين البساطة والجمال الطبيعي؟ جمعنالكن أحلى بيوت ضيافة ومنتجعات قاعدة بقلب الطبيعة.

١. سكابا، عجلتون

بقلب وادي عجلتون، سكابا هوي المهرب يلي بتحتاجو لتنسوا هموم الحياة اليومية. الطبيعة حواليكن بتجنن، جولة هايكنغ بالجبل بين التلال والشجر فكرة حلوة. وبتخلصو نهاركن مع جلسة استرخاء بالسبا بتخليكن تحسوا حالكن بعالم تاني. هون بتعيشوا جمال الطبيعة مع رفاهية وجو منعش.

الرقم: 760 710 29

٢. Blue Jay Valley، عزور

بتحبوا تجربوا النومة بالطبيعة بقلب بيت حجر؟ أو حتى بقلب بيت خشب؟ هون بتختاروا نومتكن حسب مزاجكن، وكل اختيار بيجي مع إطلالة روعة على طبيعة جزين. جو رايق وطبيعة الجنوب بتحسوها بكل تفصيل بهالمكان. مثالي لعيلة أو أصحاب بدن يعيشوا تجربة خارج عن المألوف!

الرقم: 088 880 78

٣. Eden the Cabin، يحشوش

هيدا مش بيت ضيافة عادي، هيدا البيت قاعد عالشير مع إطلالة ما بتشبعوا منها! حواليكن شلالات يحشوش وبحيرة شوان، والمنظر بياخد العقل. البيت في صالون، أوضة، مطبخ، وبساع ٤ أشخاص، هيدا المحل رح يحسسكن إنكن بجبال سويسرا!

الرقم: 636 804 03

٤. Caim Retreat، ميروبا

بدكن شوية روقان وراحة؟ هيدي الفيلا وسط جبال صخرية، وكل شباك منها عم يطل على مشهد برد الروح. هون بتنسوا الدني وبتقضوا وقت مع حالكن ومع الطبيعة، إنتو ونايمين بالتخت رح تشوفوا المنظر الحلو قدامكن!

الرقم: 494 649 81

٥. Villa Botanica، جبيل

بقلب إده، هالفيلا رح تحسسكن إنكن بقلب توسكانا. الخضار حواليكن ما بيخلص، مسبح وجنينة وقعدة ملونة، كل تفصيل معمول ليخلق جو من الراحة. هون الجمال موجود بالطبيعة وبالبساطة بنفس الوقت. فيكن تقضوا نهار ولا أروع بقلب البيسين يلي قاعد بين الشجر!

الرقم: 559 884 03

٦. Ito’s Crib، تنورين

تأكدوا إنكن تتأملوا غياب الشمس من الجنينة مع فنجان قهوة وأغاني رومانسية كرمال تشوفوا أكتر مشهد ساحر رح تشوفوا بحياتكن! الطبيعة هون صعبة تنوصف، هوا نضيف، وهدوء بيرد الروح. إذا بتحبوا تجربوا شي جديد، هيدا المحل عندو بيسين حجر طبيعي!

الرقم: 559 884 03

٧. Chez Juliette، القليعات

الديكور تراثي، الفرش كلاسيكي، وكل زاوية بتحكي عن أصالة الزمن الماضي. هون بتعيشوا تجربة جبلية لبنانية بحقيقتها، مع جو رايق وريحة هوا الجبل النضيف.

الرقم: 662 585 03

٨. La Maison du Bonheur، دير القمر

بيت قاعد وسط دير القمر التراثية مع جنينة كلها زهور وشجر ونافورة قديمة ومراجيح لتاخدوا نفس وتروقوا أعصابكن. بتطلعوا على الجنينة وبتشوفوا المنظر الخيالي وكأنو مشهد من فيلم، شي سحري على الآخر!

الرقم: 637 622 03

٩. La Maison de la Forêt، بكاسين

بقلب غابة صنوبر، الكابينز الخشبية هون هني الجمال بحد ذاتو. عندن بلكون على منظر الغابة، وترويقة بلدية على صوت العصافير غير شكل.

الرقم: 222 800 07

شوفوا كمان، شو فيكن تعملوا بقلب تعنايل؟ اكتشفوا جمال الطبيعة والأكل الطيب.