أخيراً وصلت شوكولا بيروت… النكهة اللي حبّها العالم!

بتتذكروا شوكولا بيروت يلي خبرناكن عنّا قبل فترة؟ خبر حلو وانطلاقة مميزة ومرتقبة لعشّاق الشوكولا! شوكولا بيروت من توقيع الشيف اللبناني العالمي فيليب خوري رح تكون متوفّرة حصريًا بفروع Le Noir ببرمانا والنقاش، ابتداءً من السبت 10 أيار.

النكهة يلي حبّها العالم!

الشيف فيليب شارك الخبر بحماس على إنستغرام، وكتب:

“خبر كتير كبير! رايح ع بيروت هالأسبوع لأطلق شي صار يعنيلي أكتر بكتير من ما كنت متوقع. 

من فترة، عملت بار شوكولا… كان متل رسالة حب للبنان، خلقتها خصيصًا لمشروع خيري، وما كنت ببالي أرجع أعملها. بس فجأة، صارت قصة لحالها. ملايين المشاهدات، وآلاف الرسائل والطلبات من كل أنحاء العالم. ولا مرة تخيّلت إنها رح تلمس الناس لهالدرجة. بس صار هيك، وكان لازم أمشي ورا هيدي الشرارة. وهلق راجع ع بيروت، لحتى أطلقها رسميًا!”

وبمقابلة لجريدة النهار، قال فيليب إنو الفكرة بلشت لحفل خيري لجمع تبرعات للبنان بعد الحرب، وما كان مفكّر توصل لهون. لكن التفاعل الكبير خلّوه يحس إنو الشوكولا تخطّت حدود فكرة بسيطة، وصارت تمثل شي شخصي وعميق كتير.

فيليب خوري، رغم إنو مولود بلندن، إلا إنو فخور بجذوره اللبنانية. كان يزور لبنان كل صيفية، وعاش فترة من طفولته بشمال لبنان. اشتغل مع أهم الأسماء العالمية بصناعة الحلويات وحتى عندو كتاب خاص فيه، وبيتميّز بأسلوبه الإبداعي والراقي. هيدا الشوكولا بالنسبة إلو مش قصة منتج جديد، بس “رسالة حب” بيقدّمها لوطنه.

شوكولا بيروت، رسالة حب للبنان!

شوكولا بيروت هو بار من الشوكولا مصمم بكتير شغف وحبّ للبنان. هالشوكولا معمول ع شكل طابع بريد لبناني قديم مع ختم لندن، وبيذكر كل مغترب بالوطن! عملوا الشيف خوري لكل يلي لبنان ساكن بقلبن لو وين ما كانوا بالعالم.

المكوّنات لحالها بتاخدكن رحلة ع لبنان: كراميل بزهر الليمون، بقلاوة لبنانية مقرمشة، كريمة الكاجو الناعم، وكلّو مغمّس بشوكولا حليب اللوز. الطعم غني، متوازن، بيجمع بين الفخامة والإبداع، وبيعطي إحساس بيذكّرنا بأحلى ذكريات الطفولة وتراثنا الحلو.

اليوم شوكولا بيروت جايي تحطّ بصمتها الخاصة بعالم الحلويات، بشي بيشبهنا وبيدفّي القلب🍫🇱🇧

شوفوا كمان، معرض بيروت العربي الدولي للكتاب رجع ع لبنان!