رودستر نزّل برغر شوكولا دبي وعمل بلبلة واسعة!

كنّا مفكّرين إنو خلصنا من ترند شوكولا دبي، بس شكلو العالم بعدن مهووسين فيها! رودستر Roadster نزلوا برغر جديد بطعمة شوكولا دبي الشهيرة، وهيدا أكبر دليل إنو هيدا الترند بعدو مكفّي، وشكلو باقي معنا.

من البوست يلي نزّلوا مبين إنو البرغر معمول من خبز بالشوكولا ومحشي موزاريلا حلوة، فوقو براوني غني، بوظة فستق، وطبقة عثملية مقرمشة ممزوجة مع حشوة الفستق.

متل ما توقعنا، الناس كان عندها ردود فعل مختلفة. في عالم عجبتن الفكرة كتير، وغيرن حسّوا إنو الأمور زادت عن حدّها. هيدي بعض الريكشنات اللي جمعناها من إنستاغرام وتيك توك:

محمد: “أنا جاهز“

هادي: “هيدي متل لما تشتغل مشروع بغروب وما حدا عرف يقول لأ ع الفكرة”

لاريسا: “فكرتها كذبة أول نيسان، وانتبهت إنو نحنا بأيار”

مارينا: “شي بزعّل يا رودستر، بتمنى يرجع البرغر عندكن متل قبل“

تاليا: “تحمست ودغري شفت إذا أوّل نيسان أو لأ!”

علي: “رح تاخدني ٥ أيام ركض بس حتى إحرق يلي أكلتو“

فالنتينا: “بليز قولولي هيدي بوظة“

مش مأكدين إذا فينا نتحمل السكر الزايد، بس واضح في كتير عالم جاهزين يجرّبوا! إذا دقتوا، خبرونا إذا بيستاهل…ممكن نحنا نجربوا كمان.

وإذا زهقتوا من ترند شوكولا دبي، في شي جديد وصل ع لبنان: شوكولا بيروت! الشيف اللبناني-الأسترالي فيليب خوري، الحائز على جوائز، قرّر يعمل رسالة حب لبيروت على شكل شوكولا بتذكرنا بتراثنا.

المكوّنات لحالها بتاخدكن رحلة ع لبنان: كراميل بزهر الليمون، بقلاوة لبنانية مقرمشة، كريمة الكاجو الناعم، وكلّو مغمّس بشوكولا حليب اللوز. تعرفوا عليها أكتر هون.

إنتو شو رأيكن ب برغر شوكولا دبي من Roadster?

شوفوا كمان، انسوا شوكولا دبي! صار في شوكولا بيروت، جبيل، جنوب وكل لبنان!