درب الأمازون بلبنان: هيدي الغابة الغريبة اللي ما بتعرفها!

“درب الأمازون” ب بقعتوتة بسكنتا، من أجمل المسارات الطبيعية بلبنان، وسمّوه هيك لأنو بيشبه غابات الأمازون بتضاريسه وشجره الكثيف. بقعتوتة قاعدة على ارتفاع 1300 متر بجرود كسروان، وبتخبّي بين جبالها خضار وسحر ما بينوصف. هالمنطقة صارت ملجأ لكل حدا بيحب الطبيعة وبيهوى روح المغامرة، ومع كل خطوة فيها، بتحسوا حالكن عم تغوصوا بعالم تاني!

الضيعة الجبلية هيدي، خضرا على طول، ومليانة شلالات وبحيرات وصخور. هيدا كله بيجذب عشاق التسلّق والمغامرات من كل مكان. بقعتوتة فيها محمية طبيعية للغزلان والذئاب، وبتصير مقصد للسياحة بالشتا لما تلبس التلج، فبتتحوّل لوجهة ساحرة بكل الفصول. 

شو ناطركن ب درب الأمازون؟ جهزوا الصباط المريح والمعدات لأنو هيدا المسار مش هيّن!

درب الأمازون من أصعب المسارات بلبنان، بس المغامرة فيه عنجد بتستاهل. الطريق مش سهلة، ولازم تمشوا بمسار طويل وفيه شوية تعب وتحدّيات، لتوصلوا لجبلين لازقين ببعض، وكل هالوقت النهر عم يرافقكن وماشي حدّكن بين الجبلين. هدفكن توصلوا على البركة من فوق محل ما فيكن تسبحوا، وبعدها في منظر خيالي من فوق الوادي. هيدا شو لازم تتوقعوا بهيدا المشوار:

تضاريس غنيّة ملونة: الدرب فيه شلالات، بحيرات، ينابيع، وأرض موحلة، وهالشي بخليه جنّة لكل حدا بيحب المغامرات والطبيعة.

مغامرة من نوع تاني: لتكفّوا الدرب، لازم تتسلّقوا سلالم حديد، تطلعوا ع أدراج بين الشجر، تمرقوا من تحت الشلال، تنطوا فوق الينابيع، وتقطعوا بين صخور ضخمة وملوّنة.

ممرّات ضيّقة: ببعض الأماكن، الطريق ما بتساع غير لشخص واحد، وهالشي بيزيد التحدي والحماس. بس كل خطوة بتقرّبكن أكتر من مشهد طبيعي بيخطف الأنفاس: نهر بين جبلين، مي عم تطير من حواليكن، وصوت الأمازون حاضر بكل لحظة.

إذا ناويين تجربوا درب الأمازون، لازم تروحوا مع دليل بيعرف المنطقة، لسلامتكن ولتنبسطوا من التجربة. نحنا مننصحكن تروحوا مع Lebanon Outdoor Activities أو Lebanon By Nature. 

 وما تنسوا الكاميرا، لأنو المناظر عنجد خيالية! هيدا درب الأمازون بمنطقة بقعتوتة… قطعة من الجنة، ووحدة من أجمل المغامرات يلي ممكن تعيشوها بلبنان… ⛰️🌳🎒🌿📸

شوفوا كمان، 55 شط تزوروهن حول لبنان لصيف 2025