حسين مقدم وزوجته بأغرب طلاق: جربنا الزواج وما مشي الحال!

بطريقة غير مسبوقة، أعلن الممثل اللبناني حسين مقدم رسمياً عن انفصاله عن زوجتو إيمان نور الدين من خلال فيديو معها على إنستغرام. الفيديو عمل ضجة واسعة عالسوشيال ميديا، خاصة لأنه كان صريح كتير، وإجا بعد حذف الصور اللي كانت بتجمعن عن حساباتن الشخصية.

بالفيديو، سألها حسين: “لوين رايحين هلق؟”، وبكل رواق ردّت عليه: “رايحين انطلق!”

وقالت إيمان قدّام الشيخ بطريقة مازحة: “مولانا، جربنا الزواج وما مشي الحال، هلق منجرب الطلاق”.

وبآخر الفيديو، قال حسين: “تمّ الطلاق بين الطرفين برضا وقناعة كاملة من كلا الجانبين، دون أيّ خلاف، ونسأل الله التوفيق لكلّ منا في قادم الايام”.

خطوة جريئة وواعية، خاصةً إنّن قرروا يواجهوا الموضوع علناً وباحترام متبادل. مش دايمًا النهاية بتكون دراما، وأوقات الطلاق بيكون بداية جديدة للطرفين!

حسين مقدم، أعمالو بتحكي عنو!

هو ممثل لبناني من مواليد بيروت، درس بالجامعة اللبنانية وحامل دبلوم بالإخراج والتمثيل. شارك بعدد من الأعمال المميزة، منها مسلسل “نص يوم” مع تيم حسن، و”24 قيراط”. من أدواره المعروفة اللي تركت بصمة: بلبل بمسلسل “2020”، زيكو بـ”صالون زهرة”، معتصم بـ”الثمن”، ورؤوف ب”نفس”، وشقلوب بـ”كتير سلبي شو”.

وانتو شو رأيكن بهيدي الخطوة؟

شوفوا كمان، 6 مسلسلات لبنانية فيكن تحضروهن ع Netflix