بيت ناطركن ع كتف الوادي…قعدة جبل وجنينات معلّقة!

على بعد 20 دقيقة من بيروت، في جوهرة بتحسّوا حالكن فيها كأنكن بعالم تاني… عالم هادي، أخضر، وفيه كل شي بتحلموا فيه. خلونا نخبركن عن بيت الوادي!

من ضيعة العبادية، بيت الوادي ناطر يستقبلكن بقلب بيت تراثي حجري، روحو من روح الجبل وسحرو من سحر هالصنوبر. هالبيت عندو قصّة حب طويلة مع الجبل، وناطركن تعيشوها بين حيطانو هالصيفية.

نهاركن ببيت الوادي بيبلّش ع مهل… بكبّاية قهوة ع تراس واسع، قدّام جنينة ساحرة وقعدة مغمورة بأكتر من 400 شجرة فواكه مزروعة حوالين البيت. الهوا النضيف، صوت العصافير، والترويقة اللبنانية متل ما كانت تعملها ستّكن، بتجمعكن حوالين السفرة مع ناس بتحبّوهن.

النهار بيمرق بكل رواق… فيكن تتمشّوا بالجنينة، تكتشفوا الزوايا المخبّاية، وتعيشوا لحظات سلام وسعادة صارلكن زمان ما حسيتوا فيها.

جّوا، تفاصيل البيت بتحكي عن ذوق ودفى مش عادي. الغرف مريحة، بألوان هادية وديكور بيجمع بين البساطة واللمسة الفنية. لوحات، كتب، ضو شمس نازل من الشباك، وقعدات بتخليكن تغرقوا بالراحة. كل غرفة فيها روح وزاوية دافية بتعزلكن عن كل شي!

وفي كمان غرف سرّية بالبيت، صغيرة وحلوة، كل وحدة مخبّاية فيها قصص… بس إنتو بتكتشفوها.

بعد الضهر، فيكن تزوروا غابة الصنوبر القريبة من البيت، تمشوا بين الشجر وتسمعوا صوت الطيور أنتوا وعم تكتشفوا الدروب. أو ببساطة، تقعدوا وتسرحوا بنظرتك صوب الوادي. بالليل، لما يسكت كل شي، بتحس براحة نفسية من غير عالم.

خدوا نفس عميق…الجبل ناطركن عند بيت الوادي والبيت فاتحلكن قلبو! فيكن تحجزوا عبر الرابط هون، أو تتصلوا ع الرقم: 028 497 03. وما تنسوا تزوروا صفحتن ع إنستغرام @beitalwadi.

شوفوا كمان، بيت ناطركن بدير القمر… عمره ٣٠٠ سنة ومحاوط بالزيتون!