“رفيق” خارج الشاشة… نازك الحريري توقف عرض المسلسل من جديد!

هيدا الأسبوع، كان من المفترض إنو ينطلق عرض مسلسل “رفيق” على MTV، وهو عمل مؤلف من 30 حلقة بيروي سيرة رئيس الحكومة السابق رفيق الحريري. لكن قبل البث، صدر قرار قضائي بوقف العرض بعد دعوى رفعتها أرملته، نازك الحريري. فشو القصة؟

مسلسل رفيق صرلو 10 سنين جاهز!

المسلسل من كتابة شكري أنيس فاخوري وإخراج نديم مهنا، وتصوّر من حوالي عشر سنين. بيركّز على المسيرة السياسية والإقتصادية للحريري وإرثه الوطني، وبيبعد عن حياته الشخصية. مع هيك، ما قدر يحصل على الضوء الأخضر للعرض.

^{الممثلين علاء علاء الدين وديانا فاخوري بموقع تصوير “رفيق”.}

الممثّلين علاء علاء الدين وديانا فاخوري شاركوا بالمسلسل، بس من أوّل الطريق نازك الحريري كانت معترضة. سنة 2015، طلع حكي إنو نازك كانت معترضة ع إنو الممثلة ديانا فاخوري تجسّد شخصيتها، وقالت إنو في كتير ممثلات أنسب لهيدا الدور. بس من ناحية تانية، في معلومات بتقول إنو اعتراضها ما كان بس على الممثلين، بس ع العمل من أساسو.

شو كان رد الـ MTV؟

المحطة عبّرت عن خيبة أملها من قرار المحكمة، خصوصًا إنو كان مخطّط ينعرض المسلسل هالأسبوع. وصرّحت إنو هالخطوة بتضرّ بإرث رفيق الحريري، وقالت إنو العمل تنفّذ بكل احترام وبناءً على معلومات دقيقة من ناس مقرّبين منه، وحتى بدعم من ابنه سعد الحريري.

وأضافوا: «حياة الرئيس الشهيد التي قدّمها فداءً عن اللبنانيّين الأحرار، ليست أبداً ملك عائلة أو وريث، بل هي ملك جميع اللبنانيّين الذين غالبًا ما يترحّمون على صاحب مقولة: «ما حدا أكبر من بلدو»».

طيب… هل رح نشوفو شي نهار؟

شركة الإنتاج NMPRO قالت إنو العرض متوقف من جديد. وما حدا بيعرف إذا منرجع منشوفو ع الشاشة.

حبيتوا مقالنا عن مسلسل رفيق؟ شوفوا كمان، عم تكب زبالتك ع الطريق؟ حضّر حالك لضبط بـ100 دولار!