احتجاجات بطرابلس خلال عرض كوميدي… شو صار؟

اندلعت احتجاجات بطرابلس خلال عرض الستاند أب كوميدي الشهير بلبنان “Awkword” ، وخلّت الممثلين والمنظمين والحضور محاصرين جوّا.

هالعرض معروف إنو بيطرح مواضيع سياسية ويومية بلبنان بطريقة ساخرة، واجه توتّر كبير وقت تجمع عدد من أهل المنطقة برا المسرح وبلشوا بالاحتجاج. بحسب الكوميديان نور حجار، يلي الكل بيعرفوا من عروض Awkword، هالاحتجاجات إجت بعد ما تمّ إلغاء عرض سابق لإلن بصيدا.

في حكي إنو المظاهرات صارت بعد إنتشار إشاعات إنو نور حجار وشادن فقيه رح يكونوا من المشاركين بالعرض. الاتنين معروفين إنن بيحكوا عن مواضيع جدلية وما بيخافوا ينتقدوا السياسة والدين.

بس بالحقيقة، ولا واحد منن كانوا على المسرح بهيدي الليلة. مع هيك، الدعوات التحريضية اللي انتشرت قبل كم يوم من العرض خلقت جو متوتر كتير.

بعد ما خلص أول عرض، تجمع عدد من المحتجين برا، وبلشوا يهتفوا شعارات ضد العرض بحجّة إنو عم يهدد “الأخلاق العامة”.

وتمّ إلغاء العرض التاني. وصلت القوى الأمنية وقدرت تأمن خروج آمن للممثلين والحضور.

القصة عملت ضجّة كبيرة عالسوشيال ميديا وردود مختلفة من الناس. في ناس اعتبروا اللي صار دليل على قديه حرية التعبير بلبنان بعدها هشّة، وناس تانيين قالوا إنو لازم هالعروض تراعي الحساسيات المحلية.

لحدّ هلق، Awkword ما طلعوا بأي بيان رسمي. بس الحادثة رجعت فتحت نقاشات سابقة عن الرقابة، وخاصة بعالم الكوميديا بلبنان.

شوفوا كمان، “رفيق” خارج الشاشة… نازك الحريري توقف عرض المسلسل من جديد!