إنترنت ستارلينك على الأبواب بلبنان.. وهيدي كلفة الاشتراك المتوقعة!

عم يشهد قطاع الاتصالات بلبنان تطوّر لافت، مع قرب دخول خدمة الإنترنت الفضائي “ستارلينك” ع السوق. وزارة الاتصالات عم تشتغل بجدية لتأمين دخول لبنان على لائحة الدول يلي بتستفيد من خدمات “ستارلينك”، خصوصاً إنو بتشكّل فرصة كبيرة للشركات وللبنية التحتية الرقمية بالبلد.

حسب مصادر من وزارة الاتصالات، شركة “ستارلينك” بيّنت جدّية واضحة بدخولها على السوق اللبناني، وبلّشت تشتغل على استكمال كل الإجراءات الإدارية والقانونية اللازمة لتسجّل رسميّاً بلبنان. وبعد ما تخلص هالإجراءات، رح يروح الملف ع مجلس الوزراء، ومن المتوقّع يتّخذ القرار النهائي بالإطلاق الرسمي قبل نهاية شهر حزيران.

اعتماد نظام “ستارلينك” بلبنان يعتبر دعم إضافي للشبكات المحلية خاصة بحالات الطوارئ أو الانقطاعات الكبيرة. هالشي بدون ما يحل محلها أو ينافسها بشكل مباشر. هالخطوة بتعزز مكانة لبنان كمركز آمن للاتصالات، وبتشجع جذب الشركات العالمية وتعزز فرص الاستثمار بمختلف القطاعات. الخدمة، بحسب توقعات الوزارة، رح تخلق إيرادات للدولة، خاصة مع اشتراك شهري ما بيتعدّى الـ100 دولار. 

ولكن، هالخطوة كانت مرفوضة من شركات الإنترنت بلبنان، وقدّمت كتاب لوزير الاتصالات شارل الحاج بتشرح فيه ملاحظاتها الفنية، المالية، والقانونية.

الشركات حذّرت إنو دخول “ستارلينك” رح يخلّيها تخسر تقريباً 25% من زباينها. غير إنو ممكن يخفّض مدخول الدولة، لأن الأرباح رح تروح مباشرة لبرا. وطالبت بتنظيم دخول “ستارلينك” بطريقة مدروسة وبإطار قانوني واضح.

ومع اقتراب الاتفاق النهائي مع “ستارلينك”، يبدو أن لبنان عم يستعيد مكانته كمركز مميز للاستثمارات وأعمال الشركات العالمية.

شوفوا كمان، عم تكب زبالتك ع الطريق؟ حضّر حالك لضبط بـ100 دولار!