خبر حلو: مطار بيروت سجل أعلى نسبة وافدين من 2019

حركة مطار بيروت رجعت تنشط بشكل ملحوظ بشهر أيّار 2025، خاصة مع ارتفاع عدد الوافدين ع لبنان اللي وصل تقريباً لـ300 ألف شخص. وهيدا أعلى رقم بيتسجّل بهيدي الفترة من بعد سنة 2019.

عدد الرحلات وحركة شركات الطيران زادت كمان، ما بين اللي وصلوا ع بيروت واللي غادروا.

تفاصيل الحركة بشهر أيّار كانت على الشكل التالي:

الركّاب:

خلال أيّار 2025، استعمل المطار حوالي 560,050 راكب، يعني زيادة بنسبة 10.26% مقارنة مع أيّار 2024 يلي كان العدد فيه 507,892.
الوافدين ارتفع عددهم بنسبة 12% ووصل لـ299,700، أما المغادرين فكانوا 260,322 بزيادة 8.37%.

أما ركاب الترانزيت فعددهم بقي منخفض كتير، وسجّل بس 28 راكب، يعني نازل تقريباً 87%.

بيكون عدد الركّاب من أول السنة لآخر أيّار وصل لـ2,409,387 مقارنة بـ2,292,764 السنة الماضية، يعني في زيادة حوالي 5%.

الطيران:

الرحلات الجوية بهيدا الشهر كانت 4,607، بزيادة 7.28% عن أيّار 2024.
الرحلات اللي وصلت ع لبنان كانت 2,304 (زيادة 7.11%)، واللي طلعت من لبنان كانت 2,303 (زيادة 7.46%).

هالأرقام بتدلّ على بداية موسم ناشط بالمطار، وبتعكس اهتمام متزايد بلبنان كوجهة سياحية وبلد جاذب للوافدين، خاصة مع بدء فصل الصيف وتوافد سياح الخليج ع لبنان. وإذا استمرّ هالزخم، ممكن نشوف موسم سياحي واعد بالأشهر الجاية!

شوفوا كمان

هيدي أسعار تذاكر الطيران ع بيروت لصيف 2025!