شباب المستقبل، صار في حفلة سبيستون بلبنان!

مين منّا ما بيرجع صغير بس يسمع شارة “القناص” أو “ريمي”؟ بتتذكّروا وقت كنا نقعد قدام التلفزيون ساعات وما نزهق؟ نغني مع شارة “هزيم الرعد” ونعيش مغامرات “أبطال الديجيتال”؟

هالذكريات الحلوة راجعة تعيش معنا من جديد ببيروت مع حفلة سبيستون. هيدي مش بس حفلة! هيدي رحلة صغيرة على أيام الطفولة، على ضحكات ما كانت تخلص، ع الأغاني اللي كنا نردّدها بدون ما نزهق.

السبت 2 آب 2025، مترو المدينة بالحمرا رح يتحوّل لعالم سبيستون. تخيّلوا حالكن قاعدين مع أصحابكن، يمكن نفس رفقاتكن من أيام زمان، وعم تغنّوا سوا “دراغون بول” و “المحقق كونان” كإنو ولا يوم مرق.

الأبواب بتفتح الساعة 8 المسا، والحفل بيبلش 8:30 مع بلو راديو وفرقة Out of Tune يلي رح يرجعنا على أجمل ألحان سبيستون وزمن الكرتون الدهبي بأسلوبن الموسيقي الخاص.

هيدا الحدث مش بس يلي كبروا ع محطة سبيستون! هوي لكل حدا بعده حامل طفل صغير بقلبه، ولكل حدا اشتاق يهرب شوي من هم الدني ويرجع يعيش طفولتو. رح يكون في طاقة كتير حلوة، ناس كلّن كبروا متل بعض ع نفس الذكريات، يعني باختصار، ما في أجمل من هيك جمعة!

شباب المستقبل، ما تنسوا تحجزوا تذاكر حفلة سبيستون من هلق عبر الرابط هون ، وجهّزوا صوتكن وأحلى مود للغنا والرقص. جيبوا أصحابكن، لأنو ذكريات بتصير تحلى أكتر وأكتر كل ما رجعنا عشناها سوا 💫🧡

شوفوا كمان، 35+ حفلة ناطرتكن بلبنان خلال تموز 2025