أخيراً، مطعم الفلمنكي المحبوب صار عندو فرن!

الفلمنكي، الكافيه البيروتي اللي كلنا منحبّو ومنحب قعدتو ونكهاتو اللبنانية الأصيلة، فتح فرن جديد! هيدا كل شي لازم تعرفو عن هالمطرح.

شو ناطركن:

الفرن فاتح بنقاش، فرن تقليدي بيقدّم صاج، مناقيش، وكل شي طيب طالع دغري عن النار.

بيفتح بكير كتير من الساعة 7 الصبح، يعني محطّة مثالية قبل الشغل إذا عبالكن تتروقوا شي سخن وطازة. وحتى إذا كنتو من النوع اللي بيفيق بكير، رح تحبّو تمرقوا هونيك.

من الصاج للمخبوزات الطازة، هيدا المحل بيهتم بالنوعية وبيخلّيكن تحسّوا بجو الأصالة اللبنانية.

المنيو عندن بيحتفل بالمخبوزات اللبنانية الأصيلة، بيقدموا مجموعة واسعة من المعجنات المالحة والحلوة الطازة من الفرن. هيدي بعض الأكلات اللي لازم تتوقعوها:

– مناقيش وصاج: فيكن تختاروا بين الزعتر التقليدي، زعتر ولبنة، جبنة العكاوي، أو جبنة العكاوي الحرة. إذا عبالكن شي دسم أكتر، جرّبوا الحبش والجبنة أو اللحمة بعجين.

– عجين خاص: الفرن بيقدم أنواع عجين خاص متل زعتر بري (عجينة قمحة كاملة مع الزعتر) و منقوشة إمي (عجينة زعتر مع جبنة عكاوي)، وفيكن تضيفوا خضرة، كبيس، أو هالبينو.

– بيتزا على الطريقة اللبنانية: المنيو بتشمل خيارات كلاسيكية متل المارغريتا، النباتية، البيبروني، وبيتزا لبنانية عليها حبش وزيتون أسود وفطر وذرة.

– ميني بايتس: متل فطاير الزعتر، رقاقات جبنة، فطاير سبانخ، زعتر أخضر، وصفيحة بعلبكية.

– مشطاح مميّز: سبانخ مع جبنة أو كفتة، وفيكن تزيدو جبنة أو هالوبينو.

شو كرمال القعدة؟

إذا كنتوا عم تدوروا على محل تتروقوا فيه قبل مشواركن، فهيدا هو المكان المثالي. فرن الفلامنكي محافظ على الجو التقليدي تبعن، وبيجمع بين اللقمة الطيبة والقعدة الحلوة.

ما ضروري تتروقوا بالسيارة قبل مشوار البحر . فيكن توقفوا عند فرن الفلمنكي الجديد لتتروقوا بكل رياحة!

كيف الأسعار؟

فرن الفلمنكي في عنده خيارات لكل الميزانيات. المناقيش، الفطاير والمعجنات، والمشروبات كلو بأسعار كتير مقبولة لوجبة خفيفة أو ترويقة سريعة. البيتزا والأطباق الكبيرة سعرها شوي أغلى. والمشروبات كمان أسعارها بتبقى رخيصة.

باختصار، محل بيقدّم مخبوزات طيب وطازة، وبأسعار ولا أحلى!

شوفوا كمان، وين تاكل وتضهر بجبيل؟ أحلى 14 محل تزوروهن هالصيف