انحذف مشهد منّو…فيلم لبناني وصل للعالمية تعرض للرقابة بلبنان

حاز الفيلم اللبناني «مشقلب» (2024) ع كتير تقدير وجوائز عالمية على طريقة طرحه العميقة للوجع يلي عاشه لبنان من بعد الانهيار الاقتصادي بالـ2019 وانفجار مرفأ بيروت بالـ2020. بس الغريب إنو رغم كل هالنجاح العالمي، الفيلم نفسه اتعرض للحجب والرقابة ببلدو الأم. شو القصة؟

شو صار؟

الفيلم كان عم ينعرض كامل متكامل بالمهرجانات العالمية، ما نقصو ولا مشهد. بس بلبنان، الرقابة ما أعطت الموافقة ع العرض إلا بعد حذف مقطع معين.

المخرج والكاتب اللي ترشّح لجائزة Emmy لوسيان بورجيلي عبّر عن إحباطه بمنشور على إنستغرام:

“مؤسف إنو يكون الفن بلبنان بعدو لليوم عم يتعرض لهيك نوع عرقلات وتشويه وحذف بدل ما يكون دور السلطات هو دعم وتحفيز الصناعات الثقافية والفنية.

وهل بعد فينا نقول عن لبنان “بلد الحريات” وقت الأفلام اللبنانية بتتعرض للرقابة والتقطيش بلبنان وبالمقابل بتنعرض متل ما هي بكل بلدان العالم؟”

شو المقطع يلي تم حذفه؟

بتعليق تحت منشورو، كشف بورجيلي عن المقطع اللي انحذف.

المشهد عن مجموعة متظاهرين قاعدين سوا وعم بيحضروا فيديو لرفقاتن كيف انضربوا بوحشية من القوى الأمنية. هيدا ع الأغلب صار خلال ثورة 17 تشرين.

بس كمان وضّح إنو ما وصلهن أي سبب رسمي للمنع. هو رجّح إنو يمكن الدولة خايفة ترجع تفتح هالملف أو تعمل توترات سياسية من جديد إذا بينعرض هالمشهد يلي بيذكّر بالعنف ضد المتظاهرين.

الممثلة ريتا حايك عبّرت عن دعمها بالتعليقات. دعمها إجا بعد إحباطها العلني بسبب استبدالها من المسرحية المشهورة “Venus”.

فيكن تقروا عن هالموضوع هون.

مؤسف إنو نشوف فيلم متل مشقلب عمل ضجة حول العالم، عم يتعرض للرقابة والمنع ببلده.

اليوم الفيلم عم ينعرض بصالات السينما بلبنان. إدعمو الفن المحلي وروحو إحضروا! يمكن بدعمكن، الفن اللبناني يرجع ياخد الحرية والاحترام يلي بيستاهلو.

شوفوا كمان، أحلى 35 مهرجان بكل لبنان خلال تموز 2025