أكل وشرب
7 مطاعم محلية بيقلّدوا مطاعم عالمية وع أطيب!
إذا كنتوا بتحبوا سلاسل الأكل العالمية، جمعنالكن 7 مطاعم محلية مستوحاة من أشهر البراندات بالعالم! من البرغر والدجاج المقرمش، للقهوة والحلويات، هالمحلات صارت بديل محلي أو نسخة لبنانية عن مطاعم عالمية، ومش بس هيك كمان ع أطيب!
1. مطعم تشيكن واي – نسخة لبنانية عن KFC
هالمطعم المشهور صار من أطيب الأماكن بلبنان لتجربوا دجاج كرسبي ومقرمش ع الآخر. بتميّز بأسعارو الحلوة، بوكساتو العائلية، والعروضات اللي دايمًا مغرية. صحيح مستوحى من KFC، بس كتار صاروا يفضّلوا تشيكن واي عليه!
الفروع: سنترو مول، سيتي مول، المشرفية، شارع بلس، بشارة الخوري.
الرقم: 999 566 76
2. مطعم ميت واي – نسخة لبنانية عن ماكدونالدز
أول ما فتح هالمحل، عمل ضجة كبيرة لأنو بيشبه ماكدونالدز كتير، خاصة بالديزاين والتغليف. الحلو إنو بتلاقوا عندن هيدا كومبو البرغر الكلاسيكي مع بطاطا مقلية تبع ماكدو، ويمكن حتى أطيب!
الفروع: سنترو مول، شارع بلس
3. مطعم Four Guys – نسخة لبنانية عن Five Guys
إذا كنّت حابب تجرّب Five Guys، هيدا يمكن أقرب شي عنّا بلبنان لسلسلة المطاعم الأميركية المشهورة ! FOUR GUYS بعمشيت بعيّشكن التجربة ذاتها، من الديكور للفستق! الحلو إنو صاحب هالمحل اشتغل عنجد بفايف غايز برا لبنان وإجا لهون ليقدملنا نفس البرغر الطيب بس بأسعار أحلى.
العنوان: عمشيت
الرقم: 878 789 71
4. Stories – نسخة لبنانية عن Starbucks
مين فينا ما جرّب Stories؟ هالمحل انشهر بالتغليف اللي بيذكّر بستاربكس، وصار عندن أكتر من 20 فرع بكل لبنان! بس الفرق؟ القهوة أطيب، وفوق هيك عندن فرويو بيجنّن.
5. Ca Burgers – نسخة لبنانية عن In-N-Out
إذا عبالكن In-N-Out ببيروت، Ca Burgers يمكن يكون أقرب شي فيكن تلاقوه! هالمحل جايي نقل ستايل البرغر الكاليفورني الشهير لعنا. متل In-N-Out، المنيو بسيطة والستايل West Coast. كتير رح تحبوا هالمحل إذا غرامكن البرغر البسيطة الطيبة!
العنوان: الجميزة
الرقم: 177 031 81
6. WeMac – نسخة لبنانية عن ماكدونالدز
محل جديد بلبنان بيقدّم وجبات ستايل مكدونالدز بأسعار مقبولة. بيقدّم دابل تشيزبرغر، ساندويشات دجاج مقرمش، وبوكس ناغتس، مع تغليف بيجمع بين الماكدو واللمسة اللبنانية.
العنوان: الحدث جنب قاروط مول
الرقم: 849 819 03
7. Copy Cat – نسخة لبنانية عن كتير مطاعم
ماكدو، KFC، وحتى ملك الطاووق و Roadster…هالمطعم عم يقلد الكل! بس الفكرة؟ بياخد أشهر الأصناف من كل محل وبيقدّمن ع طريقتو الخاصة. والمميز بعد، إنو كل شي بيتقدّم بتغليف أو علب بتشبه المطعم الأصلي، بس بستايل Copycat المهضوم!
العنوان: الزلقا
الرقم: 127 221 71
شوفوا كمان، وين تاكل بالبترون؟ أحلى 50+ مطعم بكل البترون هالصيف
