أكتر من 80 حالة تسمّم مرتبطة بـ دكتور كفتة… شو القصة؟

بحسب بعض التقارير، سلسلة مطاعم “دكتور كفتة” تحت التحقيق بعد ما أكتر من 80 شخص اشتكوا من عوارض تسمّم غذائي، وكتار منهم ربطوا يلي صار معهم بالأكل يلي طلبوه من المطعم. 

ردّاً عالشي اللي صار، سكّرت وزارة الصحة العامة كل فروع دكتور كفتة موقتاً بانتظار نتائج التحقيق. المراقبين الصحيين بلّشوا يجمعوا عيّنات ويفحصوا معايير النظافة ليعرفوا سبب الشكاوى.

الجدل بلّش عتيكتوك، لمّا ريم نعوم من Kazadoo حمّلت دكتور كفتة المسؤولية بتسمم بنتها. بفيديو انتشر بشكل واسع، قالت إن بنتها نقلوها عالمستشفى وضلت فيها كم يوم مع حرارة عالية بعد ما أكلت من المطعم. قصتها عملت ضجة كبيرة، وناس كتار بلشوا ينشروا تجارب مشابهة.

ولو بعد ما صدر أي تأكيد مخبري، عدد الشكاوى الكبير خلّى الوزارة تتحرك بسرعة.

منيو دكتور كفتة بيقدم مجموعة سندويشات لبنانية مثل الكفتة، السجق، المقانق، الفتايل، والبسطرما. كمان بيقدم بطاطا، حلويات، ومشروبات غازية.

كتار عم يطالبوا وزارة الصحة العامة بخطوات أشد لمراقبة سلامة الغذاء بلبنان. وعلى السوشيال ميديا، الناس عم يطالبوا بتوسيع الرقابة، تشديد القوانين، ومحاسبة المطاعم.

شوفوا كمان، الأكل الزايد بالمطعم مش للكب…صار فيكن تطلبوه وبنص السعر هون!