الأكل الزايد بالمطعم مش للكب…صار فيكن تطلبوه وبنص السعر ببيروت!

تخيّلوا تروحوا عالمطعم وتطلعوا بكيس مليان أكلات طازة… وبنص السعر! هيدي فكرة LastBite، تطبيق لبناني مستوحى من مبادرات عالمية ناجحة متل Too Good To Go ببريطانيا، فرنسا، وأمريكا، وهلّق صار دور لبنان يجربها. المشروع سبق وبلش بطرابلس تحت اسم Daymeh (إكبسوا هون لتتعرفوا عليه)، وهلق لقينا منّو ببيروت.

كيف بيشتغل Last Bite؟

كتير مطاعم، كافيهات، مخابز، وسوبرماركت بلبنان بيكون عندها أكل طازة زايد بآخر النهار، ما بلحق ينباع. بدل ما ينكب، LastBite بيعرضه للبيع بسعر مخفّض بيوصل حتى ل 50%. بتلاقوا كل شي من سندويشات ووجبات، لمشروبات وحلويات، وحتى خضرة وفواكه من السوبرماركت!

كيف بتطلبوا (احضروا الفيديو تحت)

1. نزّلوا تطبيق LastBite (موجود على App Storeهون و Google Play قريباً).
2. افتحوا التطبيق وتصفّحوا أقسام الأكل والأكياس المتوفرة
3. احجزوا الكيس اللي عجبكن، شوفوا تفاصيله، وحجزوه بالسلة.
4. اختاروا طريقة الدفع (كاش أو Whish Money) وطريقة الاستلام أو التوصيل… وبس!

شو في أنواع أكياس؟

1. Surprise Bag: ما بتعرفوا شو رح يكون جوا! المحل بيحطلكن أكلات زايدة بهاليوم وكلّن طازة.

2. Bundle Bag: باقة من أكتر من غرض معروفين ومكتوبين بالتفاصيل، بس بسعر مخفّض.

3. Single Item Bag: غرض واحد من منيو المحل، بسعر أرخص من العادة.

وبتحجزوا من مجموعة كبيرة من المطاعم، الكافيهات، المخابز، و السوبرماركت المحلية. وبهالطريقة، الكل بيستفيد… والأكل بينأكل بدل ما يروح عالفاضي أو للكب.

يعني إذا بدكن تجربة بتجمع بين التوفير، الطعمة الطيبة، وحماية البيئة… صار وقت تجربوا LastBite. تابعوا حسابن عالإنستغرام هون.

حبيتوا هالمقال؟ شوفوا كمان:

7 مطاعم محلية بيقلّدوا مطاعم عالمية وع أطيب!

 من البرغر والدجاج المقرمش، للقهوة والحلويات، هالمحلات صارت بديل محلي أو نسخة لبنانية عن مطاعم عالمية…