سافروا بلا فيزا…8 بيوت ضيافة بأجواء اليونان حول لبنان

مين فينا ما بيحب السفر؟ وإذا عبالكن تسافروا ع اليونان من قلب لبنان، لقينالكن الحل! خلونا نخبركن عن أجمل بيوت ضيافة بأجواء يونانية حول لبنان. 

1. Martinos Getaway، البترون

مارتينوز هي جوهرة ساحرة بقلب داريا، البترون. بتجمع بين سحر العمارة الأطلسية ونفحة من ميكونوس اليونانية، من ورا ألوان الأبيض والأزرق، والأجواء الصيفية المريحة. مع مسبح بيجنّن، قعدة جاكوزي، وخدمات مميزة، رح تحسّوا إنكن بعطلة ما بتتنسى. سواء شهر عسل من الأحلام أو نهار استرخاء تحت الشمس، هالمكان رح ياخدكن على عالم تاني. اكتشفوا كل التفاصيل بالمقال هون.

الرقم: 985 933 70

2. أنفويات، أنفه

أنفه المدينة الساحلية اللي تعتبر قطعة من اليونان بلبنان، خصوصي بالشواطئ الزرقا والبيضا، والقعدة الأطلسية المميزة. عند أنفويات، فيكن تقضوا نهار كامل على البحر خصوصي إنو قريب من شط تحت الريح، أو عم تكتشفوا أنفه شارع بشارع، أو تقضوا الوقت بقلب الجنينة عندن بأجواء يونانية إستثنائية.

الرقم: 650 240 70

El Mayan Cave .3، حامات

قعدة كهف مستوحاة من اليونان بكل تفاصيلها وألوانها الزرقا والبيضا، موجودة بقلب منتجع Rocca Marina يلي متل جزيرة يونانية صغيرة من مسابح لمطاعم وغيرها. الكهف بيطل مباشرة عالبحر بإطلالة خيالية، مجهّز بجاكوزي، وعندو جو رومانسي ما إلو حدود!

الرقم: 444 714 81

4. Aqualand Hotel & Resort، البترون

حابين قعدة يونانية مباشرة فوق البحر؟ منظر بيخطف الأنفاس ورحلة رومانسية مع الشريك؟ بانتظاركن تجربة ولا أروع بـ Aqualand البترون، وين الأجواء بتاخدكن ع سانتوريني من قلب لبنان. استرخوا بالجاكوزي، مع كاس نبيذ ومنظر البحر قدامكن… رفاهية وراحة رح تضلّوا تتذكروها.

الرقم: 844 486 70

5. Santorini Chalet، حبوش النبطية

هالمحل فيه كذا بيت ضيافة ع ستيل سانتوريني من جنوب لبنان، من الألوان للعمارة والجو الصيفي. بتلاقوا مسبح بقلب مغارة، مراجيح معلقة فوق الميّ، قعدات وديكور مريح، وجو مميز لتقضوا نهار أو ليلة!

الرقم: 308 729 78

6. Amphitriti Chalet، تحت الريح أنفه

شط تحت الريح من أجمل شواطئ لبنان، وعلى صخورو بتلاقوا أجمل بيت ضيافة بأجواء يونانية. كل شي، من الألوان للتصميم وحتى الإطلالة على البحر، بتاخدكن مباشرة برحلة ساحرة ع اليونان.

الرقم: 158 865 03

7. Anjar Village, عنجر

تخايلوا تعيشوا سحر الأجواء اليونانية القروية من قلب البقاع؟ كل اللي عليكن تعملوه تزوروا عنجد فيلدج وتشوفوا شو ناطركن بقلب البانغالوهات الساحرة.

الرقم: 669 980 70

8. Nomads Nature and Nurture، سرجبال

هالمنتجع بيقدملكن تجارب راحة وإسترخاء روحية بالطبيعة، وكمان قعدات فوق النهر وبيوت الضيافة. من البيوت اللي بيقدموها هو البيت الأزرق اللي عندو  قعدة غجرية بالغابة، الموديل الأزرق والأبيض بحسسكن رحتوا على اليونان. فيه مسبحكن الخاص، قعدة مفتوحة على الغابة، مرجوحة لترتاحوا عليها، وشجرة بنص الأوضة بتضفي جمالية وسحر على قعدتكن.

الرقم: 709 370 76

أي بيت من هيدي بيوت ضيافة بأجواء اليونان حول لبنان حبيتوا أكتر شي؟

حبيتوا هالمقال؟ شوفوا كمان:

8 مطاعم مع قعدة جزيرة بقلب لبنان

مطاعم بجو ساحر، بقلب البحر أو ع الصخر، مخبية تجارب ولا أروع … لقينالكن  8 مطاعم ساحرة مع قعدة جزيرة بقلب لبنان.