10 مطارح بقلب بيوت تراثية ببيروت

بيروت مليانة بيوت تراثية بتحمل حكايات سنين، ومع الوقت كتير من هالبيوت تحولت لمطاعم وكافيهات بيجمعوا بين روح الضيافة اللبنانية وسحر العمارة البيروتية. قناطر عالية، بلكونات مطلّة، وجنينات بتفوح بريحة الياسمين… كل مطرح فيهن بعيّشكن تجربة بتشبه بيروت بحد ذاتها. تعرّفوا معنا ع 10 مطارح ببيروت قاعدة بقلب بيوت تراثية.

1. بيت كنز، سرسق

بيت تراثي انبنى من عقود وترمّم ليصير مطعم لبناني أصيل، بيت كنز بيجسّد روح البيت البيروتي بالعمارة والضيافة. المرة الجاية، إذا عبالكن أكل لبناني، قعدة تراس رومانسية، ومنظر قناطر بتاخد العقل، بتعرفوا وين لازم تروحوا.

الرقم: 098 777 81

2. ورد وفل Wardufil، مار مخايل

ورد وفل هو بيت تراثي مرمّم بمار مخايل، بيجمع بين العمارة البيروتية والراحة العصرية. بيقدملكن زاوية زهرية ببيروت، هالجوهرة فيها تجربة حمام، سبا، كافيه، وبيت ضيافة تحت سقف واحد.

الرقم: 855 100 81

3. Liza Beirut، الأشرفية

ليزا واحد من أرقى وأجمل المطاعم ببيروت، بيقدملكن لمسة بيروتية بديكور حلو، قناطر عالية وعمارة تراثية. والتراس عندن بيخليكن تعيشوا بيروت بكل تفاصيلها!

الرقم: 105 717 71

4.  Casablanca، عين المريسة

تخايلوا في محل فيكن تتفرجوا منو ع البحر من الشبابيك المقنطرة؟ هالمطعم رح تستأنسوا فيه من القعدة البيروتية للإطلالة البحرية واللقمة الطيبة!

الرقم: 111 856 03

5. Arthaus، الجميزة

وين ما تبرموا بهالمحل بتلاقوا حالكن محاوطين بالفن من كل الميلات! الحجر القديم، الغرف المقنطرة، قعدة الجنينة… كل هالتفاصيل رح تخليكن تنغرموا ببيروت من أول وجديد.

الرقم: 160 907 71

6. بيت توريف، الجميزة

أول ما تدخلوا ع بيت توريف بيستقبلكن الياسمين المعلّق والبلاط البيروتي. عندن دار بتقعدوا فيها بتاكلوا من مونة الضيعة، وبوتيك أوتيل لتقضوا ليلة مغمورين بكل هالتراث العريق. ومش بس هيك، مخبي ع سطوحه جنينة بتاخد العقل مع أحلى بلكون مطل ع المدينة. 

الرقم: 021 384 70

7. بيت كافيه، مار مخايل

بيت بيروتي قديم بيسحركن بكل الديكور واللمسات التراثية. من البلكون المطل ع شارع مار مخايل الملون، لقعدة الجنينة بين الورود، لأوضة المونة والبيت البيروتي المخبى جوا.

الرقم: 390 761 76

8. Kalei، راس بيروت

كافيه صغير مخبّى ببيت بيروتي قديم، بيميزه القناطر الحلوة، الجنينة الهادية والقهوة المختصة. أوّل ما تفوتوا عليه بتحسّوا بالراحة، ومع كل فنجان قهوة بتعيشوا لحظة هدوء بعيد عن ضجة بيروت.

الرقم: 342 780 03

9. أغورا، الأشرفية

بدكن نخبركن عن جوهرة مخبّاية؟ هالبيت التراثي تحوّل لمطعم بحديقة سرّية بوسط الأشرفية! بتلاقوا فيه قعدة من أيام زمان، أكلات طيبة، وجو سهرات ما بينتسى.

الرقم: 304 109 70

10. جاكراندا، مار مخايل

شو رأيكن بعشا ع ضو الشموع بقلب بيت بيروتي قديم؟ هالمكان مستوحى من شجرة الجاكراندا يلي بتزيّن شوارع بيروت، عندو تراس روعة، قعدة تحت الشجر، وجو تراثي بياخد العقل.

الرقم: 522 637 76

خبرونا، أي من هيدي محلات بقلب بيوت تراثية ببيروت رح تختاروا؟