ما تفوتوا أضخم مهرجان أنمي بلبنان هالويك-اند!

كنتوا بتعرفوا إنو بلبنان بيعملوا مهرجانات لمحبي الأنمي؟ مجتمع الأنمي عم يكبر سنة عن سنة وعم يصير معروف أكتر مع ناس جداد عم يتعرفوا عليه.

هالويك-اند، مهرجان أنمي Natsu Matsuri 2025 (يلي معناها “مهرجان الصيف” بالياباني) محضرلكن يومين كاملين لكل شي أنمي، ألعاب، وثقافة يابانية.

شو ناطركن ب Natsu Matsuri 2025

المهرجان بيستقبل الكبار والصغار، ومش ضروري تكونوا مهووسين بالأنمي لتنبسطوا. ناطركن عروض حماسية من مواهب محلية، من موسيقى لايف ورقصات مميزة، لعروض كوسبلاي بتجسّد شخصياتكن المفضلة.

كل سنة، المنظمين بيستضيفوا الـ Middle East Warriorz لعرض كاليستنكس خارق، بيزيد طاقة وحماس عالبرنامج.

وبنفس الوقت، الـ artist alley بتعرض أشغال مبدعين محليين عم يبيعوا فنون، charms، وغراض مميزة وغريبة. بسطات الأكل رح تقدملكن نكهات يابانية طيبة متل التاكوياكي، حلويات بالـ matcha، وبابل تي لتضلوا عندكن طاقة. أما زون الألعاب، فبتخلي الكل يجرّب ألعاب الفيديو، ألعاب طاولة، ومسابقات ممتعة كل النهار.

شو كرمال الشخصيات؟

إذا مش سامعين بالكلمة قبل، cosplay أو الكوسبلاي يعني بكل بساطة تلبسوا متل شخصيتكن المفضلة. ومش شرط تكون من أنمي، لأنو كتير ناس بيختاروا كمان شخصيات من ألعاب الفيديو وبيعملوا كوسبلاي رهيب لإلها!

الكوسبلاي من أجمل لحظات المهرجان، وتحضروا كيف المشاركين بيجسّدوا شخصياتن المفضلة عنجد بتخلي الجو مميز. وكمان في مسابقة كوسبلاي، بيشارك فيها الكبار والصغار ليأبدعوا ويربحوا جوائز.

وكتير مشاركين بيعملوا كوسبلاي من الصفر، من صنع الإكسسوارات، تزبيط الشعر المستعار، وحتى خياطة التياب.

هالسنة، لجنة الحكام بتضم مجموعة دوليّة. Sylar، Chris، وZyad هنّي من أشهر شخصيات الكوسبلاي بالشرق الأوسط، وجايبين خبرة وإبداع سنين ع هاللجنة.

ومتل كل سنة، الكوسبلاير اللبنانية Jackie (يلي بتعتبر من أوائل الكوسبلايرز بلبنان) رح تنظّم وتقدّم المسابقة. رح يكونوا عم يقيموا الكوسبلاي، يعطوا رأين، ويشجعوا المشاركين من كل الأعمار!

كيف فيكن تشتروا التذاكر؟

فيكن تدفعوا عالباب، أو تعملوا Whish transfer لـ Mostapha Zakkour عالرقم: 926 103 81. أسعار التذاكر هي:

🎟️ بطاقة دخول ليوم واحد: $12
🎟️ تذكرتين ليومين: $20
🎟️ عالباب: $15

المهرجان رح يكون بـ30 و31 آب بـBeirut Hall بسن الفيل. لتعرفوا الموقع بالزبط، اكبسوا هون.

محمسين لمهرجان الأنمي الجاية بلبنان؟ تأكدوا تتابعوا Kaliko Friends لتعرفوا آخر الأخبار!

حبيتوا هالمقال؟ شوفوا كمان:

لمحبي كوريا واليابان، هيدي 4 أسواق آسيوية بلبنان

إذا كنتوا من عشاق السناك الياباني للكوري وغيرو، هيدي 4 أسواق آسيوية بلبنان رح تاخدكن مباشرة على قلب آسيا…