أطيب مطعم بوفيه وصل ع البقاع… “طاولة تورال” ناطرتكن!

مطعم طاولة اللي رافقنا بمار مخايل، عميق، دير القمر، باكيش ودوما… هلّق صار إلو محطة جديدة بقلب البقاع. هالمرة التجربة رح تكون مع Tawlet Tourelles بأحضان معصرة Domaine des Tourelles التاريخية. الافتتاح الأحد 7 أيلول من الساعة 11 الصبح… موعدكن بوقت موسم القطاف بين كروم عريقة، نكهات أصيلة، وأجواء بتجمع التاريخ، الطبيعة، والسفرة العامرة!

تخيّلوا حالكن قاعدين بجنينة المعمل يلي بيرجع لسنة 1868، الهوا عم يرقص بين الكروم، وأجمل المناظر البقاعية ع مدّ نظركن. وعلى الطاولة، أطيب الأكلات البيتوتية من إيد أشطر الطباخين بالمنطقة، بنكهات محلية بتحكي قصص البقاع وتراث مطبخه.

إضافة مميزة ع سوق الطيب!

طاولة سوق الطيب معروفة بتقديم الأكلات البيتوتية والوصفات التراثية يلي بتجسّد روح الضيع اللبنانية. كل طبخة معمولة على أصولها وبلمسة ستات وطباخين من مختلف المناطق، يلي لقوا بهالمشروع فرصة يعبّروا عن شغفهن بالمطبخ اللبناني وغناه. وهلق، مع Domaine des Tourelles رح تكون إضافة مميزة!

وبأجواء المطبخ المفتوح، فيكن تشوفوا كل خطوة بالتحضير قدامكن، تدوقوا الأكلات دغري، تتعرفوا ع ناس من كل لبنان، وتحكوا مع الطباخين لتكتسبوا منن أسرار وأطيب وصفات المطبخ المحلي.

كيف رح يكون برنامج نهاركن:

11:00 الصبح: كعك ومشروبات

11:30 الصبح: تجربة تذوّق النبيذ المحلي وجولة بالمعصرة (بس بـ5$ لزباين Tawlet Tourelles)

من 1:00 لـ5:00 بعد الضهر: بوفيه بأشهى أكلات البقاع

 Tawlet Tourelles بيفتح كل سبت وأحد من 11 الصبح لـ5 بعد الضهر. للحجز والمزيد من المعلومات: 137 166 03. 

حبيتو هالمقال؟ شوفوا كمان:

تجربة مميزة…مطعم إم شريف جاية ع متحف سرسق!

مطعم إم شريف المحبوب رح يطلّ بأيلول بمفهوم جديد…