السيدة الأولى نعمت عون: إطلالاتي ما بتكلّف الدولة… وإيلي صعب اتصل فيي!

بأول لقاء إعلامي إلها مع الشباب عبر شاشة LBCI، ظهرت السيدة الأولى نعمت عون بمقابلة خاصة فتحت فيها قلبها وحكت بكل وضوح عن موضوع حسّاس أثار جدل بالفترة الأخيرة: أناقتها وإطلالاتها. من وقت ما استلم الرئيس جوزاف عون سدّة الرئاسة، الكل ركّز مش بس على حضورها، إنما كمان على أسلوبها الكلاسيكي الراقي وإطلالاتها المميزة. هالشي خاصةً مع الحديث الدائم عن إنو “إطلالات السيدة الأولى الفاخرة” هي من توقيع المصمم إيلي صعب.

المقابلة فتحت موضوع حسّاس، والمذيع سألها مباشرة:

“في بعض الإنتقادات لإطلالاتك، يعني عم بحكي الموضوع بكل صراحة… إنو السيدة الأولى ما بتضهر إلاّ لابسة إيلي صعب، أو دايماً الإطلالات، الملابس يلي عم تلبسيها فاخرة، مكلفة… في ناس عم بقولوا: هل الخزينة بتتحمل إنو نهتم بإطلالات السيدة الأولى. فشو ردك ع النقطة؟”

ردّ السيدة الأولى كان متفهم وصريح:

“بدي طمّن الكل إنو ما عم يندفع شي من خزينة الدولة على مظاهري، أبداً أبداً.”

وأضافت إنو من أول يوم استلمت فيه دورها كسيدة أولى، تواصل معها المصمم اللبناني العالمي إيلي صعب. وهو أصرّ يهتم بكل إطلالاتها الرسمية، كعربون دعم وإيمان بلبنان. وعبّرت عن شكرها الكبير إلو.

بس ما وقفت هون، وأكدت إنو في كتير مصممين لبنانيين، معروفين ومش معروفين، عم يقدّموا أعمالن ويساعدوها لتظهر بصورة مشرّفة وجميلة. وقالت:

“ما رح أذكرن واحد واحد أحسن ما انسى حدا وما أعطيه حقّه. هني عم يهتموا بإطلالاتي اليومية وحتى إطلالاتي بالحفلات والمهرجانات، وعم يطلعوني بأحلى صورة. من قلبي بشكرن على وقوفن حدّي وعلى الصورة الحلوة يلي عم يعطوني ياها.”

الرسالة كانت واضحة: إطلالات السيدة الأولى مش ممولة من خزينة الدولة، إنما مبادرة من مصممين لبنانيين بيعتبروا إنو صورتها واجهة للبنان. والمقابلة عكست جانب صريح وبسيط من شخصية نعمت عون، يلي حبّت توضّح إنو الشفافية أولوية عندها، وإنو أناقتها صورة للإبداع اللبناني بعالم الموضة.

حبيتو هالمقال؟ شوفوا كمان:

تجربة مميزة…مطعم إم شريف جاية ع متحف سرسق!

مطعم إم شريف المحبوب رح يطلّ بأيلول بمفهوم جديد…