رجعت أيام الحمرا…إفتتاح سينما لو كوليزي بمهرجان حافل!

لمحبي السينما والفن، في أخبار كتير حلوة جايّة من بيروت! بعد انتظار طويل، سينما لو كوليزي أخيراً رح تفتح أبوابها للجمهور يوم 13 أيلول 2025. هالسينما، اللي تعتبر وحدة من أقدم الصالات السينمائية في بيروت، عم ترجع للحياة بفضل جهود المخرج والممثل قاسم إسطنبولي وجمعية تيرو للفنون (TAA) المتخصصة بالفنون والتراث الثقافي اللبناني.

إعادة التأهيل ما كانت بس ترميم الحيطان والكراسي، هيدا مشروع هدفه إحياء الثقافة والفن ببيروت. السينما الجديدة رح تصير جزء من المسرح الوطني اللبناني. رح تتحوّل لمساحة ثقافية حرة بتنظم ورش تدريبية، عروض أفلام، مهرجانات، وعروض فنية متنوعة ومجانية.

وبمناسبة الافتتاح، رح يكون مهرجان لبنان المسرحي الدولي في بيروت من 13 لـ 16 أيلول بسينما لو كوليزي بالحمرا! مع عروض مسرحية، أفلام، وورش فنية رح تعيد الحياة للسينما وتجذب كل محبي الفن والثقافة.

وصف قاسم إسطنبولي المشروع كتكملة لحلمه اللي بلّش قبل حوالي سبع سنين مع تأسيس المسرح الوطني اللبناني، أول مسرح وسينما مجانية بلبنان. هالشي إجا بعد مشاريع ناجحة متل سينما الحمرا، المسرح الوطني اللبناني بطرابلس، سينما ستارز بالنبطية، وحتى تحويل سينما ريفولي بصور لمسرح المدينة الوطني.

مع افتتاح لو كوليزي، الجمهور رح يقدر يعيش تجربة سينمائية ومسرحية مميزة، يتفرج على عروض متنوعة، ويشارك بورشات ثقافية ملهمة. بيروت جاهزة ترحب بجمهورها مرة جديدة، ولو كوليزي جاهزة ترجع قلب الفن والإبداع بالحمرا.

حبيتوا هالمقال؟ شوفوا كمان:

ودعوا الصيف…أحلى 20 مهرجان بلبنان خلال أيلول 2025

أبرز فعاليات هالشهر وبلشوا جهّزوا حالكن لأجواء مليانة موسيقى، أكل، وفن!