عبير الصغير ع سبيستون…الشيف اللبنانية بمسلسل كرتوني!

سبيستون رجّعتلنا حماس الطفولة بخبر بيجنّن! قناة سبيستون الشهيرة أعلنت عن إطلاق مسلسل كرتوني جديد بعنوان “عبير والصغير”، بالتعاون مع الشيف وصانعة المحتوى اللبنانية عبير الصغير. هالمسلسل بيجمع بين عالم الطبخ ومتعة الرسوم المتحركة بطريقة مبتكرة ما سبق وشافها المشاهد العربي.

سبيستون نزلت أول بوستر على إنستغرام، وبيّن فيه عبير الصغير كشخصية كرتونية بطولية، جنب قط صغير على الأغلب رح يرافقها بسلسلة مغامرات مليانة خيال ومرح. التعليق كان كتير لافت: “من وصفات مطبخها الدافئ إلى عجائب عالم الرسوم المتحركة!”

شو قصة المسلسل؟

المسلسل مكوّن من 10 حلقات وبتدور أحداثه بقلب مملكة مليانة ألوان وحياة. العمل موجه للولاد من عمر 6 لـ 12 سنة، ومن المقرّر أن يبلّش عرضه بالربع الثالث من 2025.

بالعمل، بتظهر عبير كبطلة عم تخوض رحلة مؤثرة لتساعد أمير صغير من ذوي الاحتياجات الخاصة بمواجهة الاكتئاب. عكس الصورة المألوفة بهيك أعمال، المسلسل بيقدّم شخصية “الأمير” بطريقة ملهمة ومميزة، وعبير بقوتها الخارقة بترافقه خطوة خطوة لتجاوز التحديات وتكتشف معو كيف يلاقي الأمل من جديد.

حسب القناة، هدف العمل هو يلهم الولاد، يقوّي ثقتهن بنفسهن، وبيركّز كمان على أهمية الأكل والمشاركة والدعم العاطفي لبناء علاقات أقوى.

حلم وصار حقيقة!

عبير بنفسها عبرت عن حماسها، وكتبت ع انستغرام: “بحكي لعبير الصغيرة اللي كانت تتابع كل مسلسلات سبيستون… إنها اليوم بطلة على تلك الشاشات.” خطوة وصفت بحلم الطفولة اللي صار حقيقة، خاصةً إنو الآلاف من المتابعين بيشبهوها بأميرات ديزني من خلال ستايلها وحركاتها ومحتواها. واليوم صارت شخصية كرتونية بعالم سبيستون!

بعد ما تبيّن إذا صوت الشخصية رح يكون بصوت عبير شخصياً أو بصوت مؤدية محترفة. إنتو شو رأيكن؟

الخبر عمل ضجة كبيرة عالسوشال ميديا، والناس شافوا هالتعاون كخطوة مميزة بتجمع شهرة عبير مع عالم الكرتون، خصوصًا مع رسالة إنسانية بدعم ذوي الاحتياجات الخاصة.

ونحنا فخورين بالمبدعين اللبنانيين يلي عم يرفعوا اسم لبنان ويخلّوا ولادنا يلاقوا قصص بتشبهن وبتعطيهن أمل.

حبيتوا هالمقال؟ شوفوا كمان:

مشاعر ولادكن صارت أوضح… MoodiMe موجود ليساعدكن!

تعليم الأطفال كيف يعبّروا ويحكوا عن مشاعرهن ممكن يكون تحدّي