مهرجان الباروك: أكل طيب، زراعة، ومشوار بالغابة ( الدخول مجاني)

شو عاملين بالويك-اند؟ بلدية الباروك الفريديس عم تحضرلكن تجربة سياحية وترفيهية مختلفة عن كل شي تاني!

مهرجان مواسم الباروك الفريديس فعالية مجانية بتجمع بين التراث والطبيعة ليومين ورا بعض، السبت والأحد 13-14 أيلول، من الساعة 4 العصر للساعة 7 المسا، بموقع نبع الباروك جنب البلدية. هالحدث مخصص لكل الأعمار، للعيلة، للأصحاب، ولأي حدا بيحب الطبيعة، التراث والأكل الطيب.

رح يكون في جولات مشي بين الحقول لتستمتعوا بالهوا الطلق والبيئة الطبيعية، وتتعرّفوا على جمال الباروك.

مش بس هيك، في فرصة لتلتقوا مع المزارعين وتزرعوا بإيدكن، لتشوفوا كيف بتنزرع الخضرة  والفواكه العضوية، وحتى تتعلموا شوية حيل وأسرار عن الزراعة من زمان.

إذا بتحبوا تدوقوا أطيب المأكولات المحلية، رح يكون في أطباق بسيطة ولذيذة، وكمان أكلات تقليدية ما بتتفوت. وما ننسى القهوة الطازة يلي بتاخدكن شوي بالذكريات مع ريحتها الطيبة.

الأجواء الفنية كمان رح تكون حاضرة، مع موسيقى العود بين الطبيعة، وعروضات فنية بتعكس تراث المنطقة. لعشاق المغامرة والطبيعة، في فرصة لركوب الخيل وسط المناظر الخلابة، وكمان Hike بالمحمية الطبيعية لأرز الباروك بين الغابات وشجر الأرز العتيق.

مواسم الباروك الفريديس مش بس سياحة وطبيعة، هي كمان فرصة لاكتشاف الأماكن الأثرية والدينية، ودعم المشاريع المحلي بطريقة ممتعة.

مهرجان الباروك مليان أكل طيب، موسيقى، تراث وطبيعة… وكل هالشي مجاني مع العيلة والأصحاب! ما تفوتوا عليكن هالفرصة!

حبيتوا هالمقال؟ شوفوا كمان:

ودعوا الصيف…أحلى 20 مهرجان بلبنان خلال أيلول 2025

في أحلى من إنو تودعوا الموسم بمهرجانات آخر الصيف؟