وداعاً لطوابير النافعة … هيك صار فيكن تخلصوا معاملاتكن!

خبر حلو لكل حدا بدو يسجّل سيارته! وقّعت وزارة الداخلية والبلديات مذكرة تفاهم بين هيئة إدارة السير وشركة ليبان بوست، بحضور الوزير أحمد الحجار. الهدف هو تسهيل إنجاز المعاملات وتخفيف الضغط ع مراكز النافعة وتيسير أمور المواطنين.

حسب هيئة إدارة السير والآليات والمركبات (النافعة)، رح يبلّش التطبيق من اليوم الخميس 18 أيلول 2025، وبيصير بإمكانكن تبلّشوا تخلّصوا معاملاتكن عبر مكاتب ليبان بوست لهيدي الخدمات:

1. نقل ملكية سيارات السياحة الخصوصية والدراجات النارية المسجّلة مسبقاً بالدكوانة وجونية.
2. تجديد رخص السواقة الخصوصية والعمومية.

ومن بعدها رح يعلنوا عن خدمات إضافية بتصير متوفّرة بمكاتب ليبان بوست.

وذكّرت الهيئة إنو بعد فيكن تخلّصوا معاملاتكن متل العادة: يا إمّا بالحضور الشخصي عالمراكز، يا إمّا عبر وكيل قانوني، وبالحالتين لازم تحجزوا موعد مسبق عبر المنصة الإلكترونية الخاصة فيهن: tmo.gov.lb.