جنينة اليسوعية: نشاطات حلوة، أسواق، وفن لكل الحي!

من سنة، جنينة اليسوعية رجعت تنبض بالحياة بفضل مبادرة أهلية اسمها “لقاء حديقة اليسوعيين”. الفكرة بلّشت من سكان الحيّ يلي حبّوا يرجعوا يحيوا هالمساحة الخضرا، ويحوّلوها لمطرح جامع لكل الناس: صغار وكبار، عيل، طلاب وحتى تجّار المنطقة.

هالجهود صارت بشراكة بين مكتبة السبيل، جمعية بيت البركة وأهالي الحي، وتم فيها إعادة تأهيل كاملة للجنينة: الأرضيات والممرات تجددت، النوافير رجعت تشتغل، القعدات صارت مرتّبة ومريحة، وانزرع شجر جديد. كمان تم الاهتمام بالمحيط الأثري للكنيسة القديمة، وترمّم الملعب ليصير آمن أكتر للولاد. الهدف كان خلق مساحة نظيفة، آمنة ومفتوحة لكل الناس، حتى لذوي الاحتياجات الخاصة.

هالمساحة أغلب نشاطاتها مجانية ومفتوحة للكل، بس في كمان مبادرات بتاخد دخولية صغيرة متل السوق الدائم، كرمال يضل في استمرارية.

النشاطات متنوعة وبتلبّي رغبات الناس: من أسواق بتدعم المنتجين المحليين، مكتبة وبازارات كتب، لورش بيئية وزراعية، ورش فن للولاد وكمان الحرف اليدوية للكبار، عروض موسيقى وأفلام، صبحية وألعاب طاولة وحتى نادي المشي… يعني الجنينة صارت مساحة ثقافية واجتماعية، مش بس مساحة خضرا.

اليوم، “لقاء” عم يكمل بمشاريع جديدة وحماس أكبر. ومن أبرز النشاطات الجاية: Vintage Garden Market بسوق مفتوح بقلب الجنينة. الزوار رح يلاقوا تحف ومقتنيات مميزة، تياب أنيقة وقطع مختارة بعناية، كل هيدا بجو طبيعي بين الشجر. هون التفاصيل:

الجمعة 10 تشرين الأول: من 4 بعد الضهر لـ 10 بالليل

السبت 11 تشرين الأول: من 4 بعد الضهر لـ 10 بالليل

الأحد 12 تشرين الأول: من 4 بعد الضهر لـ 8 المسا

فيكن تتواصلوا عبر واتساب على الرقم: 81996476.

جنينة اليسوعية بجعيتاوي صارت اليوم قلب نابض للحيّ ومطرح بيرجع يذكّرنا بأهمية المساحات الخضرا العامة ببيروت.