أمل جديد! علاج ثوري لسرطان الثدي صار متوفّر بلبنان

بما إنو لبنان عم يتحضّر للشهر العالمي للتوعية حول سرطان الثدي، في خبر كتير مهم: تسجّل وانطلق بالبلد علاج مستهدف جديد لسرطان الثدي المتقدّم HER2-positive وHER2-low.

العلاج مطوَّر من AstraZeneca بالتعاون مع Daiichi Sankyo، وهو الأوّل من نوعه اللي بيستهدف النوعين سوا. بيشتغل بتقنية حديثة (ADC) يعني بيربط حالو على بروتينات HER2 عالخلايا السرطانية، وبيدخّل العلاج الكيميائي دغري جوّا الخلية. النتيجة؟ فعالية أعلى وأضرار أقل عالأنسجة السليمة.

الدكتور روجر خاطر، أخصائي دم وأورام ورئيس الجمعية اللبنانية لطب الأورام، قال: إطلاق هذا العلاج المبتكر يعكس صمود وتقدم قطاعنا الصحي ويعد خطوة مهمة لإدماج الابتكار العالمي في رعاية المرضى اللبنانيين.”

ليه هالشي مهم

سرطان الثدي بعدو بشكل النسبة الأعلى من حالات السرطان عند النساء بلبنان: حوالي 33.6% من الحالات الجديدة، يعني تقريبًا وحدة من كل تلات إصابات سرطان عند السيدات. بسنة 2022 لحالها كان في 2,161 حالة جديدة و781 وفاة. واليوم أكتر من 6,800 امرأة عايشين مع تشخيص خلال آخر 5 سنين.

مع إنو الحملات التوعوية والفحوصات المبكرة ساعدت، بس الحالات المتقدمة (خصوصاً يلي بتتصنّف كـHER2-low) كانت دايماً بلا خيارات علاج مخصصة. عالمياً، حوالي 60% من حالات سرطان الثدي المنتشر بتقع ضمن هالفئة HER2-low.

مدعوم بدراسات عالمية

العلاج الجديد جربوه بدراسات دولية كبيرة (مثل DESTINY-Breast03 وDESTINY-Breast04) وبيّن تحسّن كبير بالبقاء على قيد الحياة مقارنة بالعلاجات القديمة.

البروفسور جورج شاهين من أوتيل ديو قال:

“إقرار هذا العلاج الموجه المبتكر يجلب أملًا جديدًا للمرضى وعائلاتهم ويدشن عصرًا جديدًا من الرعاية الشخصية ويُحسن مستقبل النساء المصابات بأنواع HER2-إيجابي وHER2-ضعيف”

خطوة لقدّام للنساء بلبنان

وصول هالعلاج عالسوق اللبناني بيعتبر نقطة تحوّل جدّية. ومع اقتراب أكتوبر الوردي، الخبرية مش بس توقيتها صح، إنما كمان إشارة أمل لآلاف النساء اللي عم يواجهوا سرطان الثدي.

لمزيد من الأخبار، اكبسوا هون. ولمزيد من المعلومات عن علامات وأعراض سرطان الثدي، اكبسوا هون. وسلامة قلبكن!