فرن صغير بالحمرا بيعمل مناقيش بجريش من 1948!

إذا كنتوا عم تتمشّوا بالحمرا ولفتتكن ريحة المناقيش الطازة، ع الأغلب جاية من أقدم الأفران بالمنطقة. فرن الكبوشية Kabouchieh Bakery، جوهرة محلّية من الـ1948، ووجهتكن المفضلة لمناقيش بجبنة، الكعك الطري، والمعجّنات المخبوزة ع أصولها.

قد ما يفتحوا أفران جداد ببيروت، القديمين بيضلّوا الأطيب. يمكن السر هو سنين الخبرة، ويمكن الجيل القديم عندن وصفة سرّية بطريقة الخبز بالفرن ما حدا بيعرفها.

أغلب هالمحلات المخباية ما عندها حسابات على السوشيال ميديا، بس هالفرن قرر يبلّش ينزّل بوستات عن كل المعجنات الطيبة اللي عنجد لازم تجربوها.

شو بتلاقوا ع المنيو؟

مناقيش بكل الأنواع (كلها تحت الـ3$، إلا إذا أخدتوا مشروحة). غير الجبنة والزعتر التقليدية، في كمان لبنة مع مكدوس، قشقوان، حلوم، وغيرها.

بتعرفوا إنو بيعملوا كمان مناقيش جريش؟ إذا مش سامعين فيها، هي أكلة جنوبية معمولة من القمح المجروش (الجريش)، وبتعطي المناقيش قوام مميز ودسم. بينخلط عادةً مع سمسم وحبّة البركة، وهالوصفة متوارثة من أجيال. الريحة لحالها بتفتح النفس.

شوفوا كمان:

المشطاح بجريش…خبز الجنوبيّة وتراث بحد ذاتو

اليوم رح نطلع ع الجنوب ونخبركن عن أكلة تراثية مش الكل بيعرفها أو مجربها: المشطاح بجريش.

لازم تجربوا اللحم بعجين والفطاير من عندن إذا بتحبوا الوصفات المخبوزة ع الطريقة التقليدية.

وإذا بتحبوا شي غير المناقيش، جربوا الكعكة الطرابلسية عنجد بتستاهل التجربة، إن كان بتحبوها سادة، مع زعتر، أو محشية بالجبنة.

ومنختم بالحلو من التارت الصغيرة بالمربّى، الكرواسون المقرمش، والكيكات… كلن معمولين طازة، بطبقات من الزبدة الناعمة وحلاوة متوازنة مع السكر.

لمزيد من المعلومات، تأكدوا من زيارة إنستغرام!

📍 العنوان

الحمرا، مقابل Multiverse Games

إكبسوا هون لتعرفوا الموقع بالزبط

⏰ الدوام

كل يوم من الـ5 الصبح لـ11 بالليل

📞 للتواصل

الرقم: 721 351 01 – 881 750 01