غلط بمسابقة ملكة جمال لبنان 2024، مشتركة سابقة تكشف!

مسابقة ملكة جمال لبنان دايمًا بتثير الجدل، خصوصًا وقت إعلان النتائج. الجمهور عطول عندو رأي، والجدل حول مين بيستحق اللقب ودرجة شفافية لجنة التحكيم ما بيخلص. نور سالم، مشتركة سابقة من مسابقة السنة الماضية، طلعت وفتحت نقاش كبير حول عدالة المسابقة ومصداقية التقييمات من تجربتها.

نور سالم مشتركة سابقة قررت تكون صريحة وتشارك تجربتها الشخصية بملكة جمال لبنان 2024 بفيديو نشرته على حسابها على انستغرام. السبب؟ كتير ناس سألوها عن موضوع علاماتها بالمسابقة، وبتقول إنو كتار لاحظوا غلط بعلاماتها وبعتولها مسج عن هالشي. 

 بالفيديو، حكت عن شي صار معها بخصوص علامة الحكم نور عريضة وقالت: “في حدا من لجنة التحكيم (قصدها نور عريضة) صرّحت قبل المسابقة إنو ح تحط نفس العلامة لكل البنات، يلي هي 9.95، يلي هي أعلى علامة ممكنة للبنات لأنو ما بدها تميز بين ولا بنت. 

أنا وقت قطعت عال stage، بتنزل علامة نور عريضة عندي 8.5. هلق أنا بوقتها ما انتبهت… بس بعدين صار يوصلني مسج بخصوص هالموضوع…ليه معقول نور عريضة تحطلي علامة أقل من الباقين؟”

شو صار بعدها؟

نور سالم حكت إنها بعد ما لاحظت الغلط، بعتت مسج لنور عريضة على انستغرام لتتأكد: “قالتلي إنو هي حطت نفس العلامة لكل البنات، ووقتها تواصلت مع الproduction إنو ليش في بنت نزلت العلامة عندها غلط؟ قالولها بالproduction إنو صار في glitch (غلط تقني) بالسيستم منشان هيك نزلت العلامة غلط.”

المشتركة قالت إنو هالخبر صدمها كتير، لأنها حسّت إنو تقييمها ما كان عادل بسبب هالغلطة التقنية. وأضافت إنو عندها دليل على إنو علامتها فيها غلط، وختمت كلامها: “هلق ما بعرف أديه competition بمعايير عالمية بيصير فيها glitches بس إنو أنا كنت مصدومة وقتها… يمكن هالسنة صار معي هيك، بس مش ضروري يتكرر كل سنة.”

هالموضوع فتح تساؤلات كبيرة عن عدالة المسابقات، رغم إنو وقتها ما فينا ننكر إنو ندى كوسا توّجت بجدارة ملكة جمال لبنان 2024 ووصلت نور سالم للنهائيات. 

وإنتو شو رأيكن؟ هل بتشوفوا هالمسابقات عادلة؟ وكيف لقيتوا نتائج هيدي السنة؟

حبيتوا هالمقال؟ شوفوا كمان:

بيرلا حرب توّجت ملكة جمال لبنان 2025