بازار للكتب صار كافيه مميز بالحمرا!

بوك بازار Book Bazar، من أكتر مكتبات الكتب المستعملة المحبوبة ببيروت، رجعت بحلّة جديدة… وصارت كافيه للكتب!

المكتبة يلي كانت معروفة برواياتها القديمة، والقصص المصوّرة، وكتب الطبخ المكدّسة ع الرفوف، رجعت فتحت أبوابها بقعدة جديدة، هالمرة ككافيه ومكتبة بنفس الوقت! فيكن تقعدوا، تشربوا شي دافي، وتقروا محاوطين بريحة الكتب والذكريات.

من مكتبة لكافيه

Book Bazar موجود بالحمرا من زمان، وكان دايمًا مقصد لكل حدا بيفتش على كتب مستعملة مميزة. عندن مجموعة واسعة وفريدة من الكتب بكل الأنواع واللغات.

هيك كان شكله قبل:

التغيير الجديد عطاها هويّة مزدوجة: بعدها مكتبة، بس كمان صارت كافيه مريح. صارت مش بس مطرح لتشتروا كتب، بس كمان لتقروا، ترتاحوا، وتلتقوا بأصحابكن.

شو الجديد جوّا؟

منطقة الكافيه / اللاونج: المكان مرتّب أكتر، مع كراسي وقهوة، يلي كانوا يفوتوا يبرموا بس بين الكتب صار فيهن يقعدوا شوي ويستمتعوا بالأجواء.

أقسام الكتب حسب اللغة: مجموعة الكتب الإنكليزية صارت جنب الكافيه بالطابق الأرضي، الفرنسية بالطابق الفوقاني، والعربية بالطابق التحتاني.

رجعة Book Bazar كافيه ومكتبة خطوة مميزة بتبيّن كيف فينا نطوّر الأماكن القديمة ونحافظ على روحها بنفس الوقت.

زرتوا بوك بازار ببيروت بعد؟ تأكدوا تتابعوهن على انستغرام لتعرفوا أكتر!

📍 العنوان

شارع المقدسي، مقابل Sushi Bell

⏰ الدوام

كل يوم ما عدا الأحد من الساعة 10 الصبح حتى 8 المسا

📞 للتواصل

الرقم: 726 333 03

حبيتوا هالمقال؟ شوفوا كمان:

تطبيق النقل المشترك بلبنان وصل…تابع حركة الباص لحظة بلحظة!