إنترنت أسرع بعشرات المرات…5G وصل لبنان!

دخل لبنان عصر جديد من التكنولوجيا و الاتصالات، بعد إعلان وزير الاتصالات شارل الحاج إنّو حقبة الجيل الخامس (5G) بلّشت رسميًا. 

الوزير أعلن الخبر بمنشور على منصة “إكس”، وقال فيه إنّو وزارة الاتّصالات، بالتعاون مع الهيئة المنظّمة يلي تم تفعيلها من أيام، وشركتي “ألفا” و”تاتش”، عم يطلقوا مشروع مدّته 3 سنين لتحديث الشبكات بكل لبنان وإطلاق خدمة الـ5G على مستوى الوطن.

الجيل الخامس (5G) هو تكنولوجيا إنترنت فائقة السرعة بتقدّم، هيدي مميزاته:

⚡️ سرعة خيالية بتوصل لـ 10 غيغابت بالثانية، يعني أسرع بعشرات المرات من الـ4G يلي بين إيدينا. بتقدر تنزّل فيلم HD بثواني، أو تحضر فيديو 4K بدون أي تقطّع.

🔗 قدرة توصيل ضخمة بين ملايين الأجهزة بنفس الوقت (أساس المدن الذكية، سيارات ذاتية القيادة، والذكاء الاصطناعي المتطور). 

🔋 كفاءة أعلى و استهلاك طاقة أقل 

🌍 تغطية وثبات أكتر بالشبكة حتى بالمناطق المزدحمة (متل ملاعب أو مهرجانات)، وبتعطي جودة اتصال ثابتة.

يعني ببساطة، الـ5G مش بس إنترنت أسرع، هو خطوة لعالم تكنولوجي جديد وذكي.

ليه مهم هلقد 5G بلبنان؟

الجيل الخامس هو تطوّر ضخم بعالم الاتصالات، مش بس بسرعة إنترنت، بس كمان بالفرص يلي بيفتحها قدام المستخدمين. الخدمة الجديدة رح توفّر سرعة إنترنت أعلى بكتير من الجيل الرابع 4G. اللبنانيين صاروا عنجد بحاجة لهالتطوير، خاصةً إنّو الإنترنت صار أساسي بحياتنا اليومية، من الشغل للدراسة للترفيه.

مش بس هيك، توقعوا تحسين جودة الاتّصال وخلق فرص عمل جديدة للشباب اللبناني، خصوصًا بالقطاع التكنولوجي. ومع التحديثات يلي رح تصير بالشبكات، بيتوقّع إنّو لبنان يشهد دفعة قوية بالناتج المحلي.

محمسين لخدمة 5G توصل ع لبنان؟

حبيتوا هالمقال؟ شوفوا كمان:

6 تطبيقات لبنانية مفيدة لازم تكون ع تليفونكن