خريف لبنان غير …7 ضيع ساحرة لازم تشوفوها

خريف لبنان إلو جو خاص، مع ألوان الشجر الدافية والهوا البارد شوي، والجبال والضيع بتصير كأنها لوحات فنية. إذا بتحبوا الطبيعة، المشي، والتصوير، هيدي 7 ضيع لازم تزوروها بالخريف لتعيشوا أجمل الأجواء وتكتشفوا سحر لبنان الحقيقي.

1. صوفر – عاليه، جبل لبنان

ضيعة صوفر الساحرة على المرتفعات الجبلية بعاليه، ومزينة بألوان الشجر الدافي بالخريف. من أشهر الأماكن لتزوروها هالموسم هو كورنيش صوفر، شارع طويل محاوط بالبيوت التراثية والقصور الفخمة وبيطل على وادي لامارتين.

وكمان في أوتيل غراند صوفر التاريخي وقصر دونا ماريا سرسق المهجور، كل واحد منهن بيضيف سحر خاص ع مشواركن.

2. بكاسين – جزين، جنوب لبنان

بكاسين مقصد روعة لمحبي الطبيعة، خصوصًا بالخريف. فيكن تعملوا رحلة وسط أكبر غابة صنوبر بالشرق الأوسط، أو حتى تخييم واستكشاف مسارات المشي.

وما تنسوا تمرّوا على كروم العنب والمزارع بجزين، تتجولوا بين الحقول الملونة وتجربوا النبيذ المحلي. الجو الخريفي بيحوّل كل مشهد لتحفة فنية!

3. اللقلوق – قضاء جبيل-كسروان

اللقلوق منطقة جبلية بتاخد العقل بين جبيل كسروان، غاباتها كثيفة وطبيعتها الخلابة بتخليها وجهة مميزة بالخريف. فيكن تمشوا على مسار اللقلوق – العاقورة، وتزوروا برك اللقلوق المشهورة. الجو رح يكون مثالي للتصوير والاستمتاع بالطبيعة.

4. القموعة فنيدق – عكار، شمال لبنان

القموعة وفنيدق بعكار بتقدّم مناظر طبيعية خلابة، بيوت تراثية صغيرة، ومسارات مشي بتخليكن تعيشوا أجواء عكار الريفية بكل تفاصيلها. وغابة العزر من أجمل الغابات يلي ممكن تزوروها بالخريف. أوراق الشجر بتتحوّل لألوان دافية، وبتعمل جو ساحر للمشي والتصوير والتخييم. 

جوهرة قريبة ممكن كمان تكتشوفها هي وادي حلسبان بالقبيات.

5. عميق – البقاع الغربي

بتلاقوا بضيعة عميق أكبر محمية للأراضي الرطبة بلبنان، منظر السهول المصفطة بالألوان الخريفية والحصاد الزراعي بياخد العقل! بتروحوا بتتمشوا بهالمنطقة وبتاخدوا أجمل الصور!

ومش بس هيك، إبرموا أسواق ضيع البقاع بوقت موسم اللقطين! من أحلى مواسم القطاف بالمنطقة، بتكون الأسواق مزينة بالألوان اللقطين الدافية.

6. بحمدون – عاليه، جبل لبنان

بحمدون بلدة جبلية بإطلالة خيالية، ورح تنصدموا أديه الخريف بيضيف سحر للمنطقة.

زوروا محطة بحمدون وكنيس بحمدون، تمشّوا وشوفوا البيوت التراثية المهجورة، وجربوا المعاصر والنبيذ المحلي من أقدم المعاصر بالضيعة.

7. بكفيا – المتن

بكفيا بلدة جبلية مزينة بألوان الخريف يلي بتضيف جو ساحر على كل شي حولكن. جولتكن بقلب بكفيا رح تكون مع بيوت تراثية مخباية بين الحارات القديمة. وأكيد، لا تفوّتوا زيارة أوتيل العامرية المهجور، واحد من أشهر الأماكن المهجورة بلبنان.

خبرونا، أي ضيعة بتزيدوا ع مشاوير خريف لبنان؟