بتعرفوا فيه حديقة بدخول مجاني؟ تعرفوا ع حديقة جونية العامة

كتار منّا ما بيعرفوا عن حدايق عامة مفتوحة برّات بيروت. إذا عم تدوروا على محل تتنفّسوا فيه هوا نضيف وتستمتعوا بالطبيعة، حديقة جونية العامة هي الخيار المثالي. 

الحديقة بتلاقوها جنب أوتيل ماديسون والدخول مجاني! فيكن تحضروا هيدا الفيديو عنها لتشوفوا كيف الجو والقعدات: 

شو بتلاقوا بقلب حديقة جونية العامة؟

القعدات مريحة وبتلاقوها موزعة بقلب الجنينة. لممرات واسعة ومرتّبة، مثالية للمشي الصبح، ركض خفيف، أو عصرونية مع العيلة.

حديقة جونية العامة فيها من الشجر والزهر والشتل أشكال وألوان، مليانة مساحات خضرا ونضيفة. بس الحديقة مش بس شجر، في تفاصيل صغيرة بتخلي التجربة حلوة: بير أثري مع حجر قديم، شجر الزيتون المعمّر يلي بيعطي هدوء وريحة طبيعية، وحتى دولاب الهوا مهضومة بتعطي جو ريفي ساحر. كل زاوية فيها سحرها الخاص.

بتلاقوا ملعب آمن ومسلي للولاد، علبة مخصصة لتتشاركوا الكتب، وحتى مكنات رياضية مناسبة لكل الأعمار. الجو العام هادي ومطل على البحر، وفيكن تلاقوا كتير زوايا للقعدة تحت الشجر أو على العشب. ومن أهضم الشغلات إنو فيكن تشوفوا التلفريك رايح جاية من فوقكن. 

كيف نظام الحديقة؟

أكيد في شوية قوانين لازم تتقيدوا فيها: ممنوع دخول الحيوانات الأليفة، ممنوع ركوب البيسكلات، ممنوع إدخال أكل ومشروبات، ممنوع التدخين، وممنوع قلع النباتات والشتل الموجود. وأكيد لازم نحافظ على نظافة المكان.

ساعات العمل: من 8 الصبح لغاية 6 - 7 المسا، فيكن تجوا بكرا الصبح المبكر أو بعد الضهر لتستمتعوا بالجو قبل الغروب.

باختصار، هالحديقة بجونية هي واحة صغيرة مليانة سحر وطبيعة، بتجمع بين النشاط، الاسترخاء، والخضار بين كل هالبنايات.

📞 للاستفسار: 300 913 09

📍اكبسوا هون لتشوفوا الموقع بالزبط وين.

خبرونا، حبيتوا مشوارنا ع حديقة جونية العامة؟

شوفوا كمان:

أخيراً، حديقة السيوفي فتحت من جديد…من أكبر حدايق بيروت!