المسيرات فوق لبنان: كيف تحمي تلفونك من التجسس؟

المسيرات المعادية اللي عم تحوم فوق لبنان صارت مصدر قلق جدي ويومي. بعيدًا عن خرق السيادة و استهدافاتها المستمرة اللي عم تعرّض كل اللبنانيين للخطر، كمان صارت تهديد حقيقي لخصوصية البيانات على تلفون كل حدا مننا.

بفيديو مع Megaphone News، محمد نجم، مدير مؤسسة “SMEX” المتخصصة بالشؤون الرقمية وحماية سلامة المستخدمين، حذّر من الثغرات اللي بتستغلها المسيرات وبيعطي نصايح عملية لتقليل تأثيرها.

هيك فيكن تحموا بياناتكن من المسيرات اللي عم تحوم فوق لبنان، بحسب SMEX: 

كيف الدرون بتتجسّس على تلفونك:

نجم بيشرح إنو المسيرة المعادية مزوّدة بتقنيات متطورة بتخلّيها تلتقط اتصالات وتستخرج بيانات من الهواتف لما تكون قريبة.

شو بتلقط الدرون من أجهزتنا:

1. مؤشرات قوة الإشارة، توقيتات البث، وأنماط ارتباط الجهاز بالشبكة

كل هيدا بيسمح بتحديد أجهزة فردية، تتبُّع حركتها، وبناء خرائط. كمان بعض الدرونات بتشتغل كIMISI-catcher بتلقط كل هويات تلفوناتنا (IMSI, IMEI, TMSI). هيدا بيعني رقم التلفون ورقم الشريحة وحتى ربط رقم التلفون بالهاتف.

2. إشارات الواي-فاي و البلوتوث:

استعلامات البحث (probe requests)، أسماء شبكات سبق الاتصال بها (SSIDs) — وأوقات عناوين MAC أو بصمات أجهزة إذا ما تفعّلت ميزة إخفاء/توليد عناوين عشوائية. هيدي معلومات تستخدم لتحديد تواجد الأجهزة وربطها بحركة الأشخاص.

3. صور/فيديو/حراري/رادار (EO/IR/SAR):

رصد بصري وحراري وتصوير عالي الدقّة (وجزء منه يمكن تشغيله للتعرف على لوحات السيارات، وجمع لقطات تجمعات أو مواقع معينة). كاميرات حرارية بتكشف وجود أشخاص بالليل، و رادارات متقدّمة بتكشف حركة المركبة. هيدي بيانات تُدمَج مع بيانات الراديو لربط شخص بجهاز أو مركبة.

شو اللي ما فيها الدرون عادةً التقاطه:

محتوى الرسائل الخاصة (يعني شو حكيت) (متل محادثات Signal/WhatsApp/Apple iMessage) — لا يمكن قراءتها. ولكن البيانات الوصفية بتنلقط (مين عم يتواصل مع مين، ايمتى، من أي مكان، ومين بغروب مع مين).

كيف فينا نخفف من خطورتها:

– حطّوا التلفون بوضع الطيران أو طفّوهن تمامًا حتى توقّف كل الإشارات.

– طفّوا الواي‑فاي و البلوتوث وما تخلوهن يرجعوا يتصلوا لحالهن.

– استعملوا أكياس فاراداي للأجهزة الحسّاسة لتصير «صامتة» وقت الحاجة.

– خلّوا ميزة عناوين MAC العشوائية مفعّلة إذا جهازكن بيدعمها، خصوصًا على الشبكات العامة.

– انتبهوا: التشفير بيحمي المحتوى بس ما بيمنع تتبّع مكانكن.

– تجنّبوا الوقوف على أسطح مكشوفة أو بمناطق تجمّع لأنّ الكاميرا الحرارية والصور ممكن تشوفكن حتى لو التلفون طافي.

تدابير ونصائح لحماية الهواتف من التجسس:

حسب نجم، SMEX بتنصح بهيدي خطوات لتحموا حالكن من التجسّس عبر الطيارات:

– طفوا الاتصالات اللي ما بتستعملوها: طفّوا البلوتوث والـ Wi-Fi وقت ما تكونوا بحاجة لإلن، حتى ما تقدر المسيرات تكتشف جهازكن أو تتصل فيه من دون إذن.

– دايمًا حدّثوا جهازكن: خلو النظام و التطبيقات دايمًا محدّثة، لأنّ التحديثات بتسكّر الثغرات اللي ممكن يستغلّوها المهاجمين.

– استعملوا تطبيقات مراسلة آمنة: فضّلوا التطبيقات اللي بتعتمد التشفير، وما تشاركوا معلومات خاصة ع قنوات مش محمية.

– تجنّبوا الـ Wi-Fi العام: ما توصلوا ع شبكات إنترنت عامة أو غير معروفة، خصوصًا بالمناطق اللي معروفة بوجود نشاط طيارات.

– استعملوا VPN موثوق: فعّلوا VPN لحماية الاتصال، خاصة وقت تتعاملوا مع معلومات شخصية أو سرّية.

– راجعوا أذونات التطبيقات: دايمًا فتشوا شو التطبيقات اللي عندها صلاحية الوصول لجهات الإتصال، الموقع أو كاميرا، وشيلوا اللي ما في داعي.

– انتبهوا من محاولات الاحتيال: خدو حذركن من رسايل أو روابط مشبوهة، خصوصًا إذا فيها وعود بمساعدة أو مصاري من ناس ما بتعرفوهن.

– ادعموا الحماية القانونية: شاركوا بالمبادرات و القوانين اللي بتطالب بضمانات خصوصية أكبر و مسؤولية من الدولة بحماية بيانات المواطنين.

حماية بياناتكن الرقمية بهيدي الظروف بلبنان بتتطلب وعي شخصي وتغيير على مستوى أكبر.
باتّباع هيدي النصائح، فيكن تحموا حالكن من تجسس المسيرات وتطالبوا بحماية جماعية أقوى.

هل كان هالمقال من SMEX عن كيف تحموا بياناتكن مفيدة؟ تابعوا حسابن على إنستغرام.