خلّص بيتزا كبيرة واربح 10,000$ كاش…تحدي البيتزا المجنون ببيروت!

إذا كنتوا من عشّاق البيتزا، حضّروا حالكن لتحدّي ما صار متلو ببيروت! فرن ومعجنات سليمان بالضاحية، عامل ضجّة ما بتنوصف ع تيك توك. بس هلق المحل انشهر مش من ورا الأكل… الكلّ عم يحكي عن تحدي البيتزا المجنون اللي عاملو فرن سليمان! الفكرة بسيطة بس بدها قلب قوي وبطن أقوى:

قوانين التحدي: كول بيتزا وحدة كبيرة، وعم نحكي عن بيتزا عملاقة مش بيتزا عادية، بمدّة 40 دقيقة، وبتربح جوائز كاش بتبلّش من 2000$ وبتوصل لـ 10000$! والمشاركة كمان فيها كذا مستوى:

1. بتدفع 80$ لتفوت بتحدي 2000$

2. بتدفع 100$ لتفوت بتحدي 4000$

3. أو 250$ لتفوت بتحدي 10000$

ومش بس هيك، فيكن تقبضوا هالمبلغ بالدولار كاش أو بأونصات الذهب، حضروا هون:

البيتزا شكلها بيطير العقل، محشّية جبنة على الآخر، مليانة خضرا وطعمة بتغري، يعني حتى لو ما ربحت، بتكون أكلت وحدة من أطيب البيتزا بحياتك. هالفرن مشهور بالمنطقة بطعمة المناقيش والصفيحة البعلبكية يلي عندن، ويلي بتشهي ريحتها قبل ما حتى ما تدوّقوها. 

 والأحلى من هيك؟ التحدّي صاير ترند على تيك توك ومكسّر الدني بملايين وآلاف المشاهدات! صار في 5 أشخاص ربحوا لحدّ اليوم، وفرن سليمان بينزّل فيديوهاتن أول بأول على صفحتو، يعني كل شي قدّام الكاميرا.

الناس عم تجي من كل المناطق لتجرب حظها، والجو بالمحل حماسي بجنّن.  بس ديروا بالكن، الحجز ضروري لأنّ الطلب كتير كبير، خاصةً بعد الضجة يلي عملها التحدي.

📞 للحجز: 78729629
📍 العنوان: بير العبد، حدّ جامع الإمام الرضا

يعني، إذا بتعتبرو حالكن أكيلين، روحوا جرّبوا حظكن مع تحدي البيتزا عند سليمان… يمكن تكونوا الرابحين الجايين وتفلّوا بـ 10000$ كاش!

شوفوا كمان:

منقوشة كنافة…محبوبة الجماهير صارت منقوشة بهالمحل!