محبي كوريا، هيدا أول سوبرماركت كوري بلبنان!

إذا بتابعوا الدراما الكورية و الثقافة الكورية، أكيد خطر عبالكن تجربوا السوبرماركت الكوري يلي منشوفها دايمًا بالمسلسلات. إجا حظكن، لأنّو في سوبرماركت كوري رح يفتح قريبًا بلبنان! Komemart لنفس الأشخاص ورا Nom Nom Chickin ورح يفتح قريبًا ويجيب معه أوّل سوق كوري من نوعه بلبنان، مليان سناكات، مشروبات، وأغراض يومية أصلية من آسيا.

ليه سوبرماركت Komemart مميز:

ليه السوبرماركت الآسيوية عندها سحر خاص (خصوصًا إذا بتحبّوا الثقافة الكورية):

1. سناكات و مشروبات كورية أصلية

من الراميون الحار والـtteokbokki بالجبنة، للميلك بنانا و المشروبات الغريبة، المحل رح يجيبلكن نكهات كوريا لعندكن بلبنان.

2. وجبات كورية جاهزة للأكل

فيكن تاخدوا kimbap، أطباق الرز، وlunch boxes على الطريقة الكورية، و تاكلوها دغري. هالنوع من السوبرماركت مشهورة بوجباتها الجاهزة و اللذيذة يلي فيكن تحضّروها و تاكلوها بالمحل.

3. أغراض K-beauty للبيت ومنتجات

مش بس أكل! فيكن تلاقوا ماسكات للوجه، منتجات عناية بالبشرة، أدوات مكتبية مهضومة، وأغراض للبيت متل ما منشوف بكوريا.

4. منتجات موسمية وحصرية

سناكات و مشروبات حصرية لـK-pop، بالأعياد أو التعاونات الكورية الخاصة. أغراض ما رح تلاقوها بمحل تاني بلبنان.

ما في تاريخ محدّد للافتتاح بعد، بس نحنا متحمّسين نشوف شو ناطرنا بهالمكان الجديد! تابعوهن على TikTok لتعرفوا آخر الأخبار.
المحل موجود حدّ Nom Nom Chickin وPinoy Supermarket بجل الديب.

خبرونا بالتعليقات، متحمّسين تزوروا أوّل سوبرماركت كوري بلبنان؟