اليوم نهار العزابية العالمي…11 شغلة فيكن تعملوها ببيروت!

إذا ما كنت بتعرف، 11 تشرين الثاني (11/11) هو يوم العزابية العالمي. مش قصدنا نزيدها عليك أو شي، بس هيدي 11 شغلة فيك تعملها ببيروت إذا كنت سينغل.

على القليلة عندك نهار لتحتفل فيه، مش هيك؟ 🥲

1. روح كول تاكوز ومارغاريتا قد ما بدّك مع رفقاتك بـ Luca’s ببدارو

طالما يوم العزّابية جايي نهار تلاتا، شو رأيك تستفيد من Taco Tuesday بلوكا؟ بـ22 دولار للشخص، فيك تاكل تاكوز وتشرب مارغاريتا قد ما بدّك.

2. خود كلبك ع موعد غدا بـ House of Kalee بمار مخايل

خود كلبك الوفي (يلي طلع أحسن من الإكس) وطلعو تغدّوا بـ House of Kalee، أول مطعم للكلاب بلبنان. وحتى إذا ما عندك كلب، فيك تمرق تسلّم عالكلاب يلي هونيك وتعطيهن شوية من الحب والحنان يلي ناقصينك.

3. روح عـ Zii Flower Bar بالجميزة ودلّل حالك بباقة ورد (ومشروب كمان)

أكيد فيك تشتري ورد لحالك وتشرب كاس بهالمكان الحلو بالجميزة، لأنو أكيد مش ناطر بوكيه من أي حدا!

4. أو دلّع حالك بمنتجات عناية بالبشرة من Skin Society

الحلو بالعزوبية إنو مصرياتك كلّن إلك وما في حدا تصرف عليه، يعني دلّل حالك قد ما بدّك.

5. اختبر مهاراتك الحرفية بCreativeNass أو زين فنجان السيراميك الخاص فيك بCeramic KANVAS

العلاج بالفن كتير مفيد إذا بعدك ما تخطيت الأكس. بهالمحلات، أكيد رح تلتقي بناس بيحبّوا الفن مثلك، وبيساعدوك تنسى شوي.

6. فتش على كتب تطوير الذات ونصايح بالعلاقات بـ مكتبة الحلبي بقصقص

هيدا واحد من أروع الأماكن الصغيرة بالمدينة، وبيعتبر جوهرة لأي شخص بيحب يقرأ. فيك تدور على كتاب جديد تقراه، بس تأكد إنك تلقي نظرة عالقسم الخاص بالتطوير الذاتي… خاصة إذا كانت علاقاتك السابقة فاشلة أو سامة.

7. إلعب ألعاب طاولة بـ Multiverse بالحمرا متل ما الإكس لعب بأعصابك

في كتير نشاطات حلوة بـ Multiverse، فيك تشتري merch وغراض من عالم الكوميكس. وحتى إذا ما عندك حدا تلعب معه، المكان كتير ممتع، وبتتعرّف ع ناس جداد.

8. دلل حالك بآيس كريم فرويو من Fro-U بأسواق بيروت

Fro-U عندن بار فيك تختار فيه يوغرت يوناني طيب وتحط إضافات متل ما بدّك، من فواكه فريش لحلويات. خود راحتك بالتوبينغز، اليوم لإلك!

9. جرّب تتعرف ع حدا جديد بMolo ببدارو

نهار العزّابية ما بيكمل إلا إذا تعرّفت على عزّابية غيرك بـ Molo، وما بتعرف يمكن تنقش معك وتلاقي حدا.

10. انبسط بمعرض DIVAS بمتحف سرسق

إحتفل بأيقونات العالم العربي بمعرض DIVAS بمتحف سرسق، فرصة تلتقط الصور وتخلّي الكل يحتار إذا كنت مع حدا أو لأ.

11. ضيف مطرح جديد ع ليستة ضهراتك! زور Kenshō بمار مخايل

راس رايق، أكل ياباني طيب، ومساحة مليانة فن… طريقة مميزة لتقضي نهارك مع حالك!