هيدا أجمل كافيه ع الروشة…ألذ قهوة مع بوكسات من السعادة!

بيروت مليانة كافيهات حلوة، بس تخايلوا تلاقوا وحدة بتقدم قهوة مختصة، برانش طيب، وكمان قعدتها روعة؟ مش كتير محلات بتقدم كل هالشي، بس في كافيه بالروشة بيبدع بهالشغلات.

Maison Reef هو بيسترو وكافيه مميز بالروشة، مثالي لأي شخص بدّه مكان هادي ليستمتع بوقتو لحالو، يقرأ كتاب، أو يشتغل براحة. وكمان، بيرحب بحيواناتكن الأليفة لتقضوا مع بعض عصرونية ممتعة وانتو عم تستمتعوا بالحلويات اللذيذة يلي بيقدموها.

شو ع منيو القهوة؟

هيدا الكافيه ببيروت بيقدّم لعشاق القهوة تجربة مميزة بمنيو متنوعة من القهوة المختصة. سواءً بتحبوا قهوتكن قوية أو ناعمة ومتوازنة، Maison Reef عنده شي بناسب ذوقكن.

وإذا بعدكن جداد بعالم القهوة المختصة، الباريستا عندن رح يكونوا كتير مبسوطين يساعدوكن تختاروا شي رح تحبوا.

بس إذا ما كتير عبالكن قهوة وبدكن شي طيب، فيكن تدوقوا لاتيه فستق كريمي أو شي أحلى متل لاتيه البندق. بتعرفوا كمان بيقدّموا ماتشا؟

وحتى عندن أكل طيب!

إذا كنتوا جايين ع ترويقة أو برانش، Maison Reef بقدملكن صاج سخن وطازة بطعمات بتشهي. وجبة خفيفة وطيبة بتلبق كتير مع القهوة أو الشاي.

فيكن كمان تجوا مع أصحابكن وتطلبوا ترويقة لبنانية روعة: بيض، لبنة مع رمان وفستق، حبش، جبنة، زعتر، بندورة كرزية، خيار، مكدوس، زيتون، مربّى وزبدة، مع خبز وأحلى فنجان شاي. وجبة ملونة وغنية.

يلي بيحبوا المخبوزات الطازة، فيهن يجربوا من Viennoiserie متل بان او شوكولا، كرواسون، أو رولز بالقرفة. وإذا بتحبوا الأصناف اللبنانية التقليدية، فيكن تختاروا المعجنات والبيتزا.

لعشاق الحلو، دوقوا أطيب كيك بالعسل، وكمان كيك الفدج الغني بالشوكولا.

نصيحة: إذا بدكن تعملوا سفرة لحالكن بالبيت، فيكن تشتروا من عندن منتجات المونة اللي بيجيبوها من الضيع اللبنانية.

وحتى بتلاقوا بوكسات السعادة!

هالمطرح بيقدم كمان بوكسات بتحطوا فيها طلبكن إن كان قهوة أو ترويقة، ومعها باقة ورد مهضومة تفرفحلكن نهاركن. أديه بتجنن الفكرة؟

طريقة لطيفة لتفرّح قلب حدا بتحبو أو حتى لتدلّلوا حالكن.

📍 العنوان

الروشة، مقابل Grand Café

اكبسوا هون لعنوان المحل بالزبط

⏰ الدوام

كل يوم من الساعة 7 الصبح حتى 12 بالليل

📞 للتواصل

الرقم: 038 036 03