رئيس الفيفا إنفانتينو حصل ع الجنسية اللبنانية…حقوق اللبنانيّات وين؟
بـ25 تشرين الثاني 2025، حصل رئيس الفيفا جياني إنفانتينو على الجنسية اللبنانية الفخرية، اللي منحها إلو الرئيس جوزيف عون. هالخبر انتشر بسرعة، وفينا نتخيّل ردّة الفعل والغضب الكبير عند كتار من النساء اللبنانيات.
لبنان بيعطي الجنسية الفخريّة لناس قدّموا شي مهم للبلد أو عندن علاقات قويّة فيه. والمسؤولين برّروا إعطاءها لرئيس الفيفا جياني إنفانتينو لأنّو متزوج من اللبنانية لينا الأشقر (واللي هو تبرير بيتعارض مع قوانين الجنسية بلبنان)، وكمان بسبب «علاقتو بكرة القدم المحليّة»، واللي شكلها أهم من حقوق النساء اللبنانيّات.
الاتحاد اللبناني لكرة القدم عبّر عن تقديره إلو بـ “تطوير اللعبة والدعم المستمر لكرة القدم اللبنانية.”.
وبالمقابل، قانون الجنسية التمييزي بلبنان بيمنع النساء اللبنانيات يعطوا جنسيتن لزوجهن وولادن. وهالشي بيخلّق مشاكل قانونيّة كبيرة بالسكن، الشغل، التعليم، الصحّة، وغيرها. وبحسب منظمة هيومن رايتس ووتش، هالشي بيترك كتير ولاد «معرّضين إنّن يصيروا بلا جنسيّة».
شو رأيكن بحصول إنفانتينو ع الجنسية الفخرية؟ تأكدوا تفوتوا على قسم #الأخبار على موقعنا لتلاقوا محتوى مشابه.
الأكثر قراءة هالشهر
