ليلة ميلادية جامعة… بصوت كورال جمعية المبرّات الخيرية!

هالسنة، بضيعة ضهور الشوير كان في مبادرة بتكبر القلب. البلدية استضافت كورال جمعية المبرّات الخيرية بحفلتها الميلادية السنوية بكنيسة الضيعة… خطوة يمكن تبين بسيطة، بس معناها كبير بظلّ بلد بأمسّ الحاجة لمساحات بتجمع، بتقرّب، وبتذكّرنا إنو جوهر العيد هو المحبّة، السلام، والتعايش.

البرنامج بلّش بريسيتيال ميلادي قدّمتو جمعية المبرّات الخيرية مع فرقة كاترين الغالي بكنيسة المخلّص للروم الكاثوليك. الأصوات كانت روحانية، دافية، ومليانة إحساس… وقدرت تحيي جوّ العيد وتزرع فرح حقيقي بقلوب الحاضرين. بعدها، أدّت المرنّمة أوليفيا صليبا مجموعة ترانيم بيزنطية بكنيسة المخلّص للروم الأرثوذكس.

وبحضور أهل الضيعة والزوّار، تمت إضاءة شجرة الميلاد بالساحة العامة. كانت لحظة جامعة… كبار وصغار، من كل الطوايف والخلفيات، واقفين سوا تحت ضوّ شجرة وحدة. واختُتم النهار بسوق الأكل المحلي، ومعرض النبيذ بفندق One to One، ليكمّل الجوّ بالبساطة والفرح.

هالمبادرات الوطنية اللي بتعزّز العيش المشترك والانفتاح، لازم تصير عادة بكل الضيع، مش بس بضهور الشوير. لأنو حفلة الميلاد هالسنة ما كانت بس احتفال… كانت صورة عن لبنان الحقيقي اللي منحبّو ومنفتخر فيه.