أحلى سوق ببيروت فتح كافيه…السبت عند سوق الطيب صار غير!

سوق الطيب فتح صفحة جديدة بموقعه الجديد ع جسر الواطي ببيروت، ورجعت معو كل التفاصيل اللي منحبّها… بس هالمرة مع تجربة جديدة: سوق كافيه Souk Cafe !

صار يوم السبت موعد ثابت لكل يلي بيحبّوا أجواء سوق الطيب: الأكل البيتوتي، اللمّة الحلوة، والضيافة اللبنانية الأصيلة. الجديد هون هو Souk Cafe — كافيه بقلب السوق، بيفتح كل سبت من الساعة 9 الصبح للـ4 بعد الضهر.

الفكرة بسيطة وحلوة: بتتسوّق، بتقعد، وبتاكل. بتطلب أكلك من الدكانة، بتختار طاولتك بلا حجز، وولادك بيلعبوا براحة وأمان.

المنيو لبناني أصيل، أطباق خفيفة منحبها متل اللبنة، البليلة، البيض، الحلّوم، الفول، الفتّة، الجبنة البلدية، وحلويات تقليدية متل المغلي والمهلبيّة. ومش بس هيك، بتلاقوا لاتيه، واسبريسو، قهوة لبنانية، وغيرها من المشروبات.

كل شي عم يتحضّر طازة قدّامكن بمطبخ مفتوح، ومن تحت إيدين طباخين سوق الطيّب المعروفين، وبمكوّنات محليّة جاية من ضيع لبنان.

وما بتكمل التجربة من دون جولة بالسوق: صاج، ورد، خضرة وفواكه موسمية، دكانة مونة، أشغال حرفية، منتجات عناية لبرندات لبنانية، طبخ، لحمة طازة وألبان، وساحة بتجمع الكل وتخلق جو دافي. وروح السوق بعدها: دعم المزارعين والمنتجين المحلّيين، وخلق مساحة بتقرّب الناس من بعضن.

وين رح تكونوا السبت الجاية؟ أكيد ب Souk Cafe سوق الطيب!

شوفوا كمان:

سوق الطيب نقل ع موقع جديد ببيروت! هون التفاصيل