ظهور نجم هوليوود البريطاني بمطعم ببيروت، التفاصيل هون
انتشر فيديو على تيك توك شاركته @tiffanytour، بينّت فيه هي ورفقاتها ببيروت مع شخص بيشبه بشكل كبير الممثل والمنتج البريطاني ثيو جيمس، والموضوع أثار تفاعل واسع على المنصّة.
وبعد كترة التعليقات، قررت تيفاني تشارك القصة كاملة وتشرح شو صار. بحسب روايتها، كانت هي ورفقاتها بضهرة عفوية على 16MM بالجمّيزة، ولاحظوا شاب أسمر مرق جنبهن ولفت نظرهن شكله، ليتأكدوا بعدين إنّه عنجد هو ثيو جيمس.
ومن بعد الحديث معو، طلع إنو بس جايي يزور لبنان. تغدوا بـ Liza Beirut بالأشرفية وكانوا عم يدور على محل هو وأصحابو يشربوا فيه.
ثيو جيمس هو ممثل ومنتج بريطاني. اشتهر عالميًا بدوره توبايس “فور” إيتون بسلسلة أفلام Divergent، واللي كانت نقطة تحوّل بمسيرته وخلّته من أبرز نجوم هوليوود. بعد هالنجاح، شارك بعدة أعمال معروفة، من بينها مسلسل The White Lotus (الموسم التاني)، ومسلسل The Gentlemen من إخراج غاي ريتشي، إضافة إلى Sanditon وسلسلة أفلام Underworld. غير التمثيل، عنده حضور لافت بعالم الموضة.
وهيك كانت القصة. لحدّ هلّق بعدنا مش مصدّقين إنّو ثيو جيمس عنجد ببيروت، ومنتمنّاله زيارة حلوة بلبنان. وهالقصة بتذكّرنا أديه الطلعات العفوية مع الرفقة ممكن تحمل مفاجآت غير متوقّعة، وما منعرف إمتى ممكن نصادف نجم عالمي بالطريق.
بتعرفوا إنو الممثلة العالمية ليندسي لوهان كانت هون من كام أسبوع كمان؟ فيكن تقروا كل التفاصيل هون.
الأكثر قراءة هالشهر
