أم كلثوم، فيروز، وردة… ع خشبة أشهر مسرح بالعالم مع عبير نعمة!

قصر Royal Albert Hall الشهير بلندن رح يكرّم أعظم أصوات النساء العربيات. بشهر آذار، رح يستضيف الحفلة “ليلة مع الأساطير – A Night with the Legends” للاحتفال بالنساء يلي شكّلوا تاريخ الموسيقى العربية الكلاسيكية. أم كلثوم، فيروز، وردة، صباح، أسمهان وغيرهن، رح يرجعوا للحياة مرة تانية على خشبة أشهر قصر للحفلات بلندن.

الأمسية رح تحييها المغنية العالمية الشهيرة عبير نعمة، يلي عروضها بتنقل روح هالأساطير. رح يرافقها أوركسترا لندن العربي، بقيادة باسل صالح، وأوركسترا Royal Philharmonic Concert.

كورال كامل من 70 امرأة رح يضيف بُعد جديد وقوي للأداء! جيسيكا قهواتي رح تضيف سرد قصصي بيربط كل غنية بتاريخها وتأثيرها.

وبما إنو الحفلة رح تكون قبل اليوم العالمي للمرأة، هي تحية لكل النساء يلي أغانيهن بعدها بتلهم العالم لليوم. وكل هيدا على خشبة واحد من أشهر المسارح بالعالم!

نحن متحمسين لهيدا الحفل يلي ح يضم أكبر أصوات النساء العربيات بقصر Royal Albert Hall بلندن!

شوفوا كمان:

أجمل دار ضيافة بالجنوب فتح بيت الفن!