باصات جديدة ع الكهرباء قريباً بشوارع بيروت!
على خط جبيل – بيروت، رح تدخل باصات جديدة تشتغل على الكهرباء، كهبة من برنامج الأمم المتحدة الإنمائي – صندوق البيئة العالمية – بتعطي أمل بتحسين واقع النقل العام. أي مبادرة بتخفّف عن الناس مهمّة، خاصةً لما تتعلّق بالتنقل اليومي.
هالباصات حديثة، مكيّفة، مريحة، ونضيفة، وبتقدّم تجربة أحسن بكتير من الباصات التقليدية. الراكب بيحس بالفرق من أوّل طلعة، لأنها أهدأ من الباص العادي، بتوفّر بنزين وبحاجة لأقل صيانة. كمان منيح لصحة الركاب، وبتخلّي النقل العام أكتر تطوّر واستدامة.
تشغيل الباصات على الكهربا خطوة إيجابية للبيئة، لأنها بتقلّل التلوّث وبتشجّع الناس يعتمدوا أكتر على النقل العام إذا توفّرت الخدمة بشكل منتظم.
بشهر اذار رح يتم تشغيل الباصات ببيروت، وخلال الفترة الجاية رح يتم تنظيم تشغيلها وتوزيعها بشكل أفضل.
هالخطوة تعتبر بداية مشجّعة، ومنتمنّى تتوسّع باصات الكهرباء لتشمل مناطق أكتر بلبنان. لأنو نقل عام نضيف ومريح بيعمل فرق بحياة الناس اليومية!
