وداع مسرح زقاق ببيروت…عرض الختام وسوق هالويك-اند
بيروت عم تودع واحد من أهم المساحات الثقافية فيها. مسرح زقاق أعلن عن تسكير مساحته بمنطقة الكارنتينا. ومع إنه المسرح رح يسكر أبوابه، المبادرة، الجمعية، والشغل الفني تبع زقاق رح يكملوا مشوارهن.
من يوم تأسيسه سنة 2006، صار زقاق أكتر من مجرد مسرح. كان مساحة متجذرة بالالتزام الاجتماعي و السياسي، مكان للتفكير، التعاون، و المقاومة. المسرح صار أداة لمواجهة التهميش ورفع الأصوات اللي غالباً بتنحجب عن السرديات المعروفة. وعلى مدى عقدين، بنى زقاق ممارساتو على الإبداع الجماعي وروح المشاركة.
مسرح انولد من رحم الأزمة
تأسس زقاق بنفس سنة حرب تموز 2006، يلي هجّرت آلاف الناس. بالفترة اللي بعدها، ضل الفريق حاضر بلحظات الكوارث الوطنية، مثل تهجير سكان مخيم نهر البارد سنة 2007. بهالأزمات، طوّر زقاق منهجية فريدة بالعلاج بالدراما والمسرح النفسي الاجتماعي.
مع الوقت، شغل زقاق توسّع كتير وتعدّى حدود المسرح: ورشات مع شباب بالسجن، أطفال من ذوي الإعاقة، ناجيين من العنف المنزلي، عاملات منازل، ومجتمعات متأثرة بالحرب بشكل مباشر وغير مباشر.
من ستوديو صغير لمعلم ثقافي
ستوديو زقاق تأسس أول مرة سنة 2008 بشقة صغيرة، وكان مساحة مفتوحة للفنانين والطلاب ليجربوا، يفكروا، ويتعاونوا. سنة 2016، انتقلوا لمساحة أكبر بالكارنتينا، جنب جسر نهر بيروت.
المكان الجديد ضم غرف بروفا، مسرح مجهز، كافيه/بار، ومساحة للعروض العامة. بسرعة صار حجر زاوية بمشهد الفن المستقل ببيروت، واستضاف عروض، ورشات عمل، استوديوهات مفتوحة، وتعاونات مع فرق دولية.
بس سنة 2020، انفجار المرفأ دمّر المسرح بشكل كبير. بعد سنتين ترميم، زقاق رجع فتح أبوابه سنة 2022. وحتى خلال الحرب على لبنان سنة 2024، ضل المسرح مفتوح، نظم أمسيات ميكروفون مفتوح واستضاف فعاليات للشعر، الموسيقى، القصص، وللشفاء الجماعي.
زقاق رح يكمل مشواره برا المسرح!
قبل ما يسكر أبوابه رسميًا، زقاق عم يدعو الكل يجتمع لآخر مرة بالمسرح بالكارنتينا. احتفالات الختام رح تنتهي بـ‘بازار’ يوم واحد، بيعطي الجمهور فرصة نادرة ياخدوا معهن قطع من تاريخ المسرح: أزياء، أدوات، ديكورات، وكل الأشيا اللي تجمعّت خلال سنين العروض، البروفات والسهرات
وبنفس اليوم، رح يستضيفوا فعالية الميكروفون المفتوح لختام مسرح زقاق، يلي من سنة 2023 صار مساحة للتعبير، التفكير، والإبداع قدام العنف المستمر وعدم الاستقرار. هالإصدار الأخير بيحتفل بالذكرى العشرين لمسرح زقاق وكمان بيودع المكان.
التاريخ: الأحد، 15 شباط 2026
الوقت: من الساعة 2 بعد الضهر لحد الساعة 7 المسا (المايك المفتوح بيبلش الساعة 7)
المكان: مسرح زقاق، الكارنتينا
للمزيد من المعلومات، تأكدوا تطلّعوا على الموقع الإلكتروني وإنستغرام الخاص فيهن!
