أول كافيه قطط بقلب صور، التفاصيل هون!
بجنوب لبنان، وتحديداً بمدينة صور، في تجربة حلوة لكل محبي القطط: Meow Cat Cafe. خلونا نتعرف ع أول كافيه قطط بقلب صور!
هالكافيه مش بس محل تشربوا فيه فنجان قهوة، هو مساحة صغيرة مليانة دفى ومحبة، بتجمعكن مع بسينات أليفة كتير لتلعبوا معهن وتقضوا وقت هادي ولطيف. القعدة هون مناسبة للكبار والصغار، وكل حدا بيلاقي سعادته مع هالبسّينات المهضومة.
المكان مقسوم لقسمين: قعدة برا بين الزرع لتشربوا قهوتكن ع رواق، وقسم جوا مخصص للّعب مع القطط، فيه صوفا مريحة، تخوتة للقطط، وألعاب لتسلّوهن فيهن. كل القطط عندن أليفة وبتحب الناس، وبتخلي كل زيارة تجربة دافية وممتعة.
المميز هون إنه فكرة الكافيه إنسانية أكتر من إنه ربحية. كل مصاريف الأكل، التنضيف، العلاج، والتعقيم على حساب لورا صاحبة المبادرة، ومن دون أي دعم خارجي. يعني كل فنجان قهوة بتشربوه هون بيرجع لدعم هالحيوانات: من أكل لعلاج ولتعقيم، وكل شي لازم ليوفرلهن حياة آمنة ومليانة حب.
Meow Cat Cafe كمان رسالة للتبنّي المسؤول وحماية الحيوانات من الشارع. هون بتشوفوا أديه القطط قادرة تعطي محبة وفرحة، وكيف الاهتمام بيعمل فرق كبير بحياتها. ببساطة، هالكافيه وجهة لكل محبي القطط بجنوب لبنان.
العنوان:
الحوش جنب Animal Lives Lebanon، صور
للتواصل:
الرقم: 420 096 70
تابعوهن ع انستغرام هون، وع تيك توك هون. خبرونا، حبيتوا كافيه قطط بصور؟
