شو مشاريعنا

من الضيعة لعندكن: سوق خيرات أرضي بسنترو مول (الدخول مجاني)

إذا بعدكن ما حضرتوا حالكن لرمضان، هلّق وقتها! سوق خيرات أرضي جايي يجمعلكن كل اللي بتحتاجوه بمكان واحد، وبأجواء حلوة لكل العيلة.

سوق خيرات أرضي للمونة والحرف:

السوق من تنظيم سنترو مول وبالتعاون مع أسواقنا وجمعية الشجرة الطيبة، الجمعية غير الربحية يلي هدفها دعم الزراعة بلبنان، تمكين المزارعين، وتسويق المنتجات الزراعية والحرفية، غير الدورات التدريبية والتنموية يلي بتقوّي المجتمع المحلي. السوق رح يتضمن 80 محل مشاركين بالمعرض، يعني وإنتو عم تتسوّقوا، عم تدعموا مزارعين وحرفيين البلد. وأحلى شي إنو الدخول مجاني!

هون شو لازم تعرفوا:

📍الطابق الأرضي، سنترو مول – الجناح
🗓️ من 11 شباط ل 18 شباط

🕛 الأوقات:
من الاتنين للخميس: من 12 الضهر لـ10 بالليل
من الجمعة للأحد: من 10 الصبح لـ10 بالليل

🎟️ الدخول مجاني

شو ناطركن؟

كل شي مونة لبنانية من ضيع لبنان: زيت، زعتر، مربى، كشك، دبس، حلويات بيتية، وغيرو كتير. وفي كمان عطورات، اكسسوارات، تياب، حرف يدوية، زينة رمضان، ألعاب، ديكورات، ورود… يعني من الآخر، بتقدروا تموّنوا بيتكن وتتسوقوا من نفس المحل.

ومش بس هيك! في فعاليات ونشاطات حلوة رح ترافق السوق: ندوات، لقاءات استشارية، ستاند آب كوميدي، ألعاب للولاد، و كيوسكات أكل طيب. الأجواء رح تكون مليانة ترفيه وحماس، ومناسبة لكل أفراد العيلة .

وما تاكلوا هم ولادكن في منطقة ألعاب كبيرة ومسلّية بتخلّيهن مبسوطين وإنتو عم تتسوّقوا براحتكن.

هي فرصة حلوة إنكن تدعموا الإنتاج اللبناني، تعيشوا أجواء رمضان، وتخلّصوا كل ليستة مشترياتكن بمشوار واحد.