نبع ميّ سخنة طبيعي بلبنان… كنز منسي بعكار!
بتعرفوا في نبع ميّ سخنة طبيعية بالسماقية بعكار؟ هالنبع مش عادي، هو كنز طبيعي فريد من الميّ الكبريتية السخنة، ومعروف بفوايده العلاجية الكبيرة.
القصّة بلشت بالسبعينيات وقت كانوا عم ينقّبوا عن النفط ببلدة السماقية… بدل ما يلاقوا النفط، انفجر عامود ميّ سخنة من عمق حوالي 550 متر، ارتفع حوالي 30 متر عن الأرض، بحرارة حوالي 37°م، ومع ريحة كبريت قوية.
الميّ هون مش أي ميّ… طلعت ميّ كبريتية حارة، حرارتها حوالي 46°م، غنية بالمعادن، ومعروفة بفوايدها للجلد والعظام والمشاكل العصبية. أهل السماقية صاروا يجو يسبحوا ويتحمّموا فيها، وسمّوها عنجد “الميّ السحرية” بسبب لونها الأصفر وحرارتها العالية.
فرح أهل الضيعة كتير بهالكنز الطبيعي، وبنوا فوقه كوخ حجري وأقنية رخامية لتجميع الميّ. الكل حط أمال كبيرة عليه، لأنه ممكن يقدم مشروع سياحي صحي بنافس أفضل المنتجعات بالعالم.
حتى وزارة السياحة لاحظت أهميتها، وبلشت سنة 1973 مشروع منتجع صحي ونصّبت أنابيب لنقل الميّ لخمس كيلومترات. بس للأسف، الحرب الأهلية عام 1975 وقفت كل شي، والميّ صارت تتدفّق بلا استثمار رسمي.
اليوم، بقي من البئر غرفة صغيرة، ونزل تدفق المي بنسبة 85% بسبب الإهمال. الخبراء أكدوا إنو إعادة تأهيل البئر واستثمار الميّ ممكن يحوّل السماقية لمرفق صحي وسياحي من الطراز العالمي، متل منتجعات الميّ الكبريتية بتركيا وأوروبا.
المي السحرية أو نبع الميّ السخنة بعكار هي كنز طبيعي منسي…مع الإستثمار الصح ممكن تصير وجهة سياحية مهمة بالشمال.
المصدر: أيوب صباح، أرشيف السفير.
